Presidenti ka arritur sukses mes votuesve që e hedhin votën në distancë
Presidenti Barack Obama dhe sfiduesi i tij republikan Mitt Romney, janë pothuajse barazim në vrojtimet e opinionit publik, por në një front të garës, Obama duket se ka avantazh të madh: janë amerikanët që sakaq e kanë hedhur votën e tyre. Lajmi bëhet i ditur nga agjencia “Reuters”.
Sipas një vrojtimi mbi këtë grup votuesish, Obama kryeson me 59 për qind, ndërsa Romney ka vetëm 31 për qind. “Përmasa e kampionit të vrojtuar është relativisht i vogël dhe norma e gabimit është 10 për qind, por diferenca e madhe mes dy kandidatëve e bën vrojtimin të saktë”, thotë “Reuters”.
Ndërsa zgjedhjet e 6 nëntorit janë vetëm tri javë larg, 7 për qind e të pyeturve sakaq kanë votuar personalisht ose kanë votuar me postë. Rezultatet e vrojtimit tregojnë se votimet para datës së zgjedhjeve ka gjasa që do të luajnë një rol më të madh këtë vit nga sa patën në vitin 2008, kur afërsisht një në tre amerikanë votoi para ditës së zgjedhjeve. Votimet janë hapur sakaq në një formë a në një tjetër në së paku 40 shtete.
Si Obama, ashtu edhe Romney, po punojnë për të bindur mbështetësit e tyre të votojnë sa më parë të jetë e mundur, në mënyrë që fushata e tyre të përqendrohet në trokitjet derë më derë dhe në komunikimet me telefon për të tërhequr ata që janë ende të pavendosur.
Votimet paraprake qenë një pjesë e rëndësishme e fitores së Obamës mbi republikanin John McCain më 2008-n dhe fushata e tij synon të përsërisë suksesin këtë vit. Kampi i Obamës thotë se po udhëheq mes votuesve të hershëm në Ioua e Ohajo dhe ka rezultat më të dobët se në 2008-n në shumë shtete të tjera të luhatshme. Ata shpresojnë që votimet paraprake të shmangin pasojat negative të mundshme që pritet të krijohen nga fushatat e reklamës negative që do të shpërthejnë në ditët e fundit para zgjedhjeve të 6 nëntorit.
“Ne kemi bërë investime të hershme në shtetet e fushëbetejës, ku kemi punuar për të regjistruar qytetarët dhe kemi mbajtur të hapur bisedimet me votuesit e pavendosur prej shumë muajsh, në mënyrë që të krijojmë një organizatë historike popullore që do të japë sukses kur votat të numërohen”, deklaroi zëdhënësi Adam Fetcher.
Mbështetësit e Romney thonë se pas debateve të suksesshme, ata kanë avantazh në disa shtete të rëndësishme, përfshirë Floridën, Karolinën e Veriut, Kolorado dhe Nevadën. Ata thonë se kanë parë rritje të entuziazmit dhe vullnetarizmit mes republikanëve që nga performanca e fortë e Romney-t në debatin kundër Obamës më 3 tetor.
Ekspertët thonë se gjithsesi deri tani është shumë e vështirë të vlerësosh se sa shumë do të ndikojë në rezultatin final votimi paraprak.
Saktësia e sondazhit të organizuar nga “Reuters” përmes internetit matet prej intervalit të besueshmërisë. Për 6704 njerëz që u pyetën nëse kanë votuar apo jo, norma e gabimit ishte 1.3 për qind. Për 361 njerëz që u përgjigjën se kishin votuar, norma e gabimit është 10 për qind.
15.10.2012
Burimi: Gazeta Shqip
