Nisma e firmosur nga Taulant Balla për të vendosur në rregullore një barrikadë për kërkesën e arristimit të deputetëve ka çuditur ndërkombëtarët.
Grupi parlamentar socialist i ka paraqitur kryetarit të Parlamentit, Gramoz Ruçi, disa propozime për ndryshimin e rregullores.
Ajo që bie në sy janë ndryshimet në rastin e një kërkesë të Prokurorisë për arrestimin e një deputeti.
Nisma e mazhorancës, në pikëpyetje nga ndërkombëtarët.
Sipas rregullores aktuale, sot Prokuroria mjafton të dërgojë në Kuvend një kërkesë dhe dokumentet shoqëruese.
Propozimet e socialistëve fusin shprehimisht termin prova.
Pra, Prokuroria duhet ta dorëzojë relacionin e arsyetuar, të shoqëruar me prova.
Ky debat i provave doli gjatë kërkesës për arrestimin e Saimir Tahirit.
Socialistët kërkuan që Prokuroria t’i provonte Kuvendit fajësinë.
Nga ana tjetër demokratët thanë se Kuvendi nuk është gjykatë ndaj mjaftonte dyshimi i arsyeshëm për të lejuar arrestimin e deputetit.
Pikërisht pas kësaj nisme ka folur ambasadori amerikan, Donald Lu.
Në një intervistë në gazetën “Dita” tha se ka edhe brenda mazhorancës kundërshtarë të reformës në drejtësi që kërkon të mos zbatohet.
Në draftin e PS-së është shtuar një element drithërues: Rregullorja sot parashikon që raporti i këshillit nuk është objekt diskutimi.
Por propozimet e reja të socialistëve fusin mundësin për debat. Kurse votimi, i cili sot është i fshehtë, propozohet të bëhet i hapur.
Pra, deputeti mund ta dijë se kush prej kolegëve ka votuar pro apo kundër arrestimit të tij.
Për ta ndryshuar rregulloren duhen të paktën 71 vota, të cilat grupi socialist i ka.
Ndryshimi i rregullave të përbashkëta të lojës në përgjithësi është bërë me konsensus por kësaj radhe ka shumë gjasa që opozita nuk do ta pranojë.
Ambasadori amerikan kërkoi nga opozita që ta vazhdojë aksionin e saj që të bllokojë abuzimin e mazhorancës.
Po pse PS kërkon të forcojë barrierat ndaj prokurorisë tani që pritet të nisë operacioni ndaj “peshqve të mëdhenj”?
Kush do të jetë parlamentari që pritet të hyjë në rrjetë?
Sipas gjasave do të jetë i madh. Këtë e thotë edhe ambasadori amerikan Donald Lu.
“Ku janë peshqit e mëdhenj të premtuar? Këtë pyetje i bëj çdo zyrtari të qeverisë që takoj.
Shqiptarët kanë parë njëfarë përparimi por jo rezultatet e mëdha që presin. Gjyqi i Emiljano Shullazit është drejt fundit.
Në dhjetor, Gjykata e Lartë ra dakord të shqyrtojë lirimin para kohe të Lul Berishës nga burgu.
Policia ka rritur në mënyrë dramatike përpjekjet për të kapur Klement Balilin.
Por nuk duam premtime, duam rezultate. Njerëz seriozë në qeveri dhe në opozitë kërkojnë rezultate.
Kjo përpjekje ka mbështetjen e plotë të prokurorëve federalë të SHBA dhe agjencive ligjzbatuese amerikane.
Dhe ka mbështetjen time të plotë”, tha Donald Lu.
Për lajm-shqip
Ylli Pata
