Nga Mentor KIKIA
Pasi të largohet uji nga shtëpitë dhe tokat, qeveria do të nxjerr në terren specialistët që do të bëjnë llogarit e faturës së përmbytjeve. Orendi shtëpiake, banesa, bagëti, shpendë, prodhime bujqësore. Miliona euro dëme që qeveria do të marrë përsipër ti paguajë (dmth do ti paguajmë ne, me taksat tona). Njerëz të dëshpëruar do të vazhdojnë të ankohen para kamerave, duke kërkuar ndihmë, pasi s’u ka mbetur më asgjë në shtëpi.
Kryeministri Rama tha se kjo është hera e fundit që qeveria do të paguajë dëmet e përmbytjeve. Ai sygjeroi si zgjidhje sigurimin e pronës nga të zotët dhe dëmin ta paguajnë kompanitë e sigurimit. Pra, që do të përmbytemi, kjo nuk vihet më në dyshim. Problemi është kush do të paguajë faturën.
Për 27 vjet me radhë ne ndërtuam ku deshëm, ku mundëm. Pa marrë parasysh asgjë, pa asnjë planifikim urban, pa projekte. Ndërtuam mbi kanale e në kanale, pranë lumit e në shtrat të lumit, nëpër fusha, pa rrugë e pa kanalizime. Për më shumë se çerekshekulli shkatërruam e lamë të shkatërrohet infrastruktura kulluese e ndërtuar në dekada gjatë regjimit komunist. Shkatërruam lumenjtë e pyjet.
Ndërsa sot jemi duke marrë mbrapsht faturën e kësaj sjelljeje. Qeveritë premtojnë se do të marrin masa, por edhe vetë e dinë që është e kotë. E vetmja gjë që mund të bëhet është pastrimi i kanaleve, shpesh të zëna edhe ato nga ndërtime pa leje, tashmë të legalizuara e të shndërruara në pronë që duhet rimbusuar nëse do të prishen. Ajo që është bërë në fushën e ndërtimeve nuk zhbëhet më kurrë. Asnjë qeveri nuk do të mund ti zhvendosë më shtëpitë e mbjella anembanë vendin nëpër fusha.
Në mënyrë sistematike, duket se i kemi bërë vendit atë që nuk do tia bënte dot asnjë pushtues. Jemi tashmë një vend me rrisk shumë të madh përballë fatkeqësive natyrore. Çdo vit qeveria duhet të heqë një zë më vete në buxhetin e shtetit për të çdëmtuar pasojat e përmbytjeve. Ndërsa mijëra familje, çdo vit duhet të jetojnë me ankthin e hakamrrjes së natyrës. Askush nuk mund të na e bënte më pak të jetueshëm vend tonë sesa ne vetë. Dhe tashmë s’na mbetet gjë tjetër veçse ta jetojmë këtë realitet mu bash ashtu siç e katranosëm.
Për Lajm-Shqip
Mentor KIKIA
