Më 1985 ndodhi diçka, që e mora vesh me vonesë. Ardiani, djali im i madh, që, bashkë me të vëllanë, Gentianin, i kalonin çdo vit pushimet verore pranë gjyshërve, në Pogradec.
Kishte notuar në thellësi dhe, meqë një natë më parë tre vetë kishin thyer kufirin,rojet e arrestuan.
Kjo, për t’u dëshmuar eprorëve se nuk ishin të paaftë. E kishin përplasur në një qeli të qelbur, pa dritare, dhe e kishin keqtrajtuar psikologjikisht me të gjitha mjetet.
Dyshuan se mos kish dashur të arratisej. Ishte jo larg dënimit të rëndë për tradhti, pa i mbushur ende të gjashtëmbëdhjetat!
Torturuesi i Ardianit kish qënë një polic nga Veriu. Qe martuar me një vajzë nga Pogradeci dhe ishte vendosur familjarisht atje.
Tetë vjet më vonë, ishim në një udhëtimi për në Rumani, bashkë me Bujar Kapexhiun.
Asokohë, Bujari, rektor i Institutit të Lartë të Arteve. U ndalëm në Pogradec për një kafe nërestaurantin e Hotelit “Guri i Kuq”, buzë liqenit. Kjo ishte hera e dytë, që shkonim në Bukuresht me Bujarin.
Herën e parë bashkë me ne ishin edhe Pëllumb Kulla, Agim Qirjaqi, Kastriot Çaushi dhe Gëzim Kame.
Atëhere, si shoqërues i tyre, gjatë qëndrimit disaditor në kryeqytetin rumun, u bëra dëshmitar i një fakti.
Të gjithë shpalosën, me zotësi e fisnikëri, vlerat e vërteta të artit tonë teatror e kinematografik. Madje u diskutua edhe mundësia e vënies në skenë ngaregjisori Gëzim Kame e dramës «Gjenerali i ushtrisë së vdekur» në Teatrin Kombëtar të Bukureshtit. Nuk di, përse nuk u realizua.
Në restaurantin e Hotelit «Guri i Kuq», Bujarit dhe mua, porosinë na e mori një kamarier si i tharë në tym.
Meqë më bëri përshtypje e folmja e tij veriore, e pyeta dhe u binda.
Para meje ndodhej pikërisht ish-polici, që ma kish cfilitur tim bir. S’u përmbajta dot, iu vërsula si skifter dhe me siguri i pashpirti do të kish dhënë shpirt në duart e mia.
Po të mos më ndalte Bujari e dikush tjetër,nuk di çfar…
Ndërsa im bir, kur ndodhte ta pyesin, përse nuk flet për ato momente tmerri, shprehet:- “Po të filloja të bërtisja për vuajtjet e mia nën komunizëm, do të thoshte të shkelja me cinizëm mbi vuajtjet rrënqethëse të aq e aq të rinjve të tjerë”.
Për Lajm-shqip
Kopi Kyçyku
