Në qytetin e Librazhdit, caktohet ‘ujku’, të ruajë ‘delet’!
Caktohet ‘ujku’, të ruajë ‘delet’! Një firmë private në Librazhd, është caktuar të rigjenerojë shtratin e lumit. Por, ajo është bërë vetë protagoniste të vjedhë zhavorin. Kështu ka ndodhur me firmën private, “Nuri Disha”.
Kjo e fundit ka fituar një tender lokal për të rigjeneruar shtratin dhe argjinaturën e një lumi. Bëhet fjalë për lumin e Rrapunit, që kalon në Veriperëndim të qytetit të Librazhdit. Prej vitesh shtrati i tij është bërë “miniera” e shfrytëzimit të inerteve. Nuk dihet sa individë e kompani private, janë bërë milionerë me pasuritë e shtratit të këtij lumi.
Me tonelata rërë e zhavor të të gjitha parametrave, janë marrë prej tij e shitur gjithandej. Së fundi, kur, lumi po gllabëronte tokat në brigje të tij, u gjet edhe “zgjidhja”! Firma, “Nuri Disha” do të merrej me sjelljen e shtratit të lumit të “identitet”. Por, si për ironi të fatit, ndodhi e kundërta. Firma me emër e pronar, po Nuri Disha, nisi të ngarkonte vetë zhavor për ta shitur kontrabandë. Ndërsa bëhej sikur punohej në argjinatorë, ekskavatorë të mëdhenj ngarkonin zhavor për shitje të të tretëve. Madje, Disha, jepte edhe oferta me çmim të lirë të inerteve të lumit.
Makineritë gërryese të inerteve po i afrohen bazamentit të urës duke gërryer e ngarkuar inerte. Edhe pse, ka kohë që janë ndaluar shfrytëzimet e shtretërve të lumenjëve, Disha, kishte thyer çdo ligj. Ndërkohë, dukuria i ka kaluar për interpetim ligjor, Agjencisë së Baseneve Ujore. Kjo e fundit, pritet që të marrë sanksionet ligjore. E thënë më shkurt, “ është caktuar ujku të ruajë delet “!!!
Për Lajm-Shqip
Alfrida Danushi
