Bashkia e Prrenjasit ka mundësuar ndihma për njerëz dhe bagëti të bllokuar nga dëbora.
Në zonat e thella të Bashkisë së Prrenjasit, Emergjencat Civile dhe zjarrfikësit shpërndanë ndihma për njerëz dhe bagëti të bllokuar nga dëbora.
Të paktën 30 familjeve të fshatit Sopot, u ka buzëqeshur fati në mes të dëborës. Të izoluar prej 10 ditësh ata kanë dhënë sinjalin SOS ndaj Bashkisë së Prrenjasit duke kërkuar ndihmë. Ka qenë vet Kryetarja e Bashkisë, Miranda Rira, që ka çelur dritën jeshile për ta, e cila ka aktivizuar me urgjencë, Shtabin e Emergjencave Civile. Janë siguruar mallra ushqimorë për 30 familjet e bllokuara në këtë fshat. Por jo vetëm kaq. Shtabi në fjalë ka menduar edhe për bagëtitë. 100 krerë bagëti të imta, prej dy javësh kishin mbetur pa ushqim. Për ta ishte siguruar baza ushqimore. E gjithë sasia ushqimore e mbledhur, nuk është transportuar me makina. Kjo për shkak të mungesës së rrugës. Ndaj janë siguruar mushka për mbajtjen e ngarkesës. Ndimha në fjalë ka shkuar në kohën e duhur. Banorët në Sopot e mbajnë frymën gjallë me bagëti. Për këtë arsye janë gëzuar më shumë për ushqimin e bagëtive sesa për vete.
Për Lajm-Shqip
Alfrida Danushi
06.03.2018
