Dj suedez i shumë hiteve, emri i vërtetë i të cilit është Tim Bergling, u nda nga jeta mjaft herët, në moshën 28 vjeçare. Lajmi u konfirmua prej publicistes së tij e cila shkruante:
“Me dhimbje të thellë njoftojmë ndarjen nga jeta të Tim Bergling i njohur si Avicii. Ai u gjet i vdekur në Muscat, Oman ditën e sotme. Familja është në gjendje shumë të keqe, prandaj kanë kërkuar që mediat të tregojnë respekt për dhimbjen e tyre në këto kohë të vështira. Për këtë arsye nuk do të jepet asnjë deklaratë tjetër.”
Ende nuk është treguar shkaku i vdekjes së tij, vetëm është përmendur fakti se prej kohësh Avicii vuante nga një sëmundje. Avicii njihet për hitet e shumta si “Wake me up”, “Hey Brother”. 7 muaj më parë publikoi dhe një këngë në bashkëpunim me këngëtaren me origjinë shqiptare Rita Ora, të quajtur “Lonely Together”. Kolegë dhe artistë të shumtë kanë filluar të shprehin hidhërimin e thellë që ndjejnë për një humbje kaq të rëndë në fushën e muzikës.
Këngëtarja shqiptare Dua Lipa shkruan në profilin e saj në Twitter:
“Një lajm kaq i hidhur për t’u dëgjuar. Shumë i ri dhe shumë herët. Ngushëllimet e mia për familjen, miqtë dhe fanët e muzikës së tij”.
Dj i njohur Martin Garrix shkruan:
“Nuk mund ta përshkruaj dot me fjalë se sa keq ndihem tani. Faleminderit që më inspirove mua dhe miliona të tjerë”.
Për lajm-shqip:
Klajdi Thaçi
