Kunguj “të frikshëm” bosh, por të ndriçuar nga brenda, skeletër të çuditshëm, figura hije, kostume nga më të ndryshmet. Mjafton kaq për të përshkruar Halloween, një festë me zanafillën në kohërat e lashta, por që vitet e fundit është përhapur edhe në Shqipëri, në sajë të rëndësisë që i ka dhënë media dhe kinemaja, duke shndërruar më së shumti në një festë komerciale për klubet e lokalet. Prej ditësh, qoftë edhe ambientet ku deri dje mund të pije vetëm kafene, kanë nisur të shndërrohen për t’u bërë gati për natën sotme, ndërkohë që shumë dyqane prej ditësh kanë nisur të tregtojnë veshje tipike të saj.Fare e panjohur si festë nga shumica e shqiptarëve, kjo ditë tradicionale u përhap më së shumti pas kapërcimit të viteve ’90-të. Fillimisht u kremtua pak a shumë në mënyrë snobe e më pas më konkrete me njohjen e saj. E kremtuar më shumë në Tiranë, Halloween-i , kjo festë e eksportuar në Shqipëri dhe pa traditë, gjithsesi duket se “shijohet” më së shumti nga të rinjtë dhe “club”-et. Ndërkohë që ende nuk duket të jetë e përhapur nëpër shtëpi, oborre apo rrugë praktika e zbukurimit me elementë dhe simbole të kësaj feste. Më shumë, e gjitha mund të konsiderohet një pretekst për t’u argëtuar, apo edhe për të qenë dikush tjetër, qoftë edhe për një natë.
Pra, një arsye më shumë festimi të ofron edhe Halloween-i, festa e terrorit, e shtrigave, fantazmave, përbindëshave, të cilët bëhen “kryefjalë” për një natë. Shumë më i zgjeruar është konteksti i festimi të 31 tetorit nëpër botë, ku natyrisht nuk kufizohet vetëm te kremtimi nëpër “party” të organizuar me këtë rast, siç ndodh këtu te ne. Emri i Halloween është deformimi amerikan i termit në anglisht të Irlandës, “All Hollows’ Eve”. Kjo festë tepër e lashtë mbërriti në SHBA, së bashku me emigrantët irlandezë dhe hodhi rrënjë për të vuajtur tani një transformim radikal. Por pas Halloween qëndrojnë kremtimet e lashta dhe të shenjta të perëndimit. Një festë që i ka kaluar shekujt me zakone që koha ia ka ruajtur kuptimin. E më pas 1 nëntori ishte dita kur shpirtrat kërkonin trupa për t’u mishëruar. Tashmë nuk mbetet gjë tjetër që edhe kjo ditë pas 31 tetorit, të shndërrohet në “sepeb” për “party” edhe këtu te neve!
31.10.2012
Burimi: Ikub.al
