Gjatë një bashkëbisedimi me gazetarët paraditen e sotme Edi Rama foli dhe mbi debatin e hapur mbi monumentin me 2 gishta në sheshin ‘Demokracia” në qytetin e Kavajës.
Kreu i PS vlerësoi se ky monument është një shëmti nga ana estetike dhe cilësoi se demokracinë nuk e solli Berisha, por qytetarët e Kavajës.
“Monumenti nuk ka lidhje me simbolin, por me formën, Kavaja nuk e meriton, sheshi demokracia ka qenë dhe do të mbetet, demokracinë nuk e solli Saliu, por studentët, intelektualët, shqiptarët, era e ndryshimit, Kavaja ka një rol shumë të madh”,- tha Rama.
Kryetari i selisë rozë theksoi se Bashkia e Kavajës do e rindërtojë sheshin ‘Demokracia” dhe se Berisha nuk mund të ndërhyjë në punët e pushtetit lokal.
“Ne do e ndërtojmë sheshin dhe do i japim Kavajës përmasat e një qyteti mesdhetar dhe t’i japim atij komuniteti një shesh me dimension tjetër do jetë sërish sheshi “Demokracia”, por ai monument është siç e tha kryetari i Bashkisë së Kavajës, nuk është tamam monument, nuk janë tamam as dy gishta dhe ajo është një farsë. Nuk i takon Saliut të vendosë së çdo bëjë me monumentin kur Kavaja drejtohet nga Elvis Roshi dhe për më tepër që kryeministri ende në detyrë ka thënë se asnjë fond nuk jap për këtë qytet unë, përderisa Kavaja zgjodhi atë si kryetar bashkie”.
03.06.2013
Burimi: Balkanweb
