Moisiu: Më 23 qershor duhet të ndodhë rotacioni.Uji, po nuk u përzje, thotë populli, qelbet!
Ish-presidenti, Alfred Moisiu beson se 23 qershori është rasti i ndryshimit të Shqipërisë. Në një intervistë për “Top Channel”, ai tha se është krijuar tashmë fryma se opozita është pranë pushtetit, por rotacioni, thotë ish-presidenti, duhet të shfrytëzohet për të ndërtuar shtetin e munguar për shqiptarët.
“Rotacioni duhet dhe do të ndodhë. Uji, po nuk u përzje, thotë populli, qelbet. Por unë nuk jam për rotacion që të ikë njëri dhe të vijë tjetri. Rotacioni duhet të vijë për të ndërtuar shtetin, për të ngritur gjyqësorin, për të luftuar korrupsionin realisht e jo me fjalë”, – ka deklaruar Moisiu.
Duke u ndalur tek procesi zgjedhor, ish-presidenti e cilëson një handikap të madh mungesën e një KQZ-je funksionale.
“Kjo të krijon njëfarë pasigurie. Shpresova se do të kishim një ndryshim, por pavarësisht thirrjeve të ndërkombëtarëve, kokëfortësia e mazhorancës në këtë drejtim është e pashpjegueshme”, – ka nënvizuar Moisiu.
Por megjithatë, ish-presidenti sjell në vëmendje 2011-ën, kur KQZ-ja, pavarësisht se ishte e plotë, u përdor sipas tij për ndryshimin e rezultatit, ndaj zgjidhja është te masiviteti i votës në zgjedhje. “
Shqiptarët duhet të dalin në votim. Të mos presim të na i zgjidhë Amerika apo Europa problemet, por duhet ta zgjidhë shqiptari me votën e tij”, – ka thënë Moisiu.
Në mungesë të pesë votave në KQZ për të certifikuar rezultatin përfundimtar, ish-presidenti kundërshton ata që deklarojnë se këtë mund ta bëjë Kolegji Zgjedhor.
“Nuk mundet dhe nuk duhet ta bëjë Kolegji. Kjo i takon KQZ-së. Kolegji nuk duhet të pranojë çdo kërkesë që i shkon, pasi ai merret me ankesat pasi i ka shqyrtuar KQZ-ja. Dhe nëse e bën, kjo është një shkelje e rëndë e një institucioni gjyqësor”, – ka theksuar Moisiu.
20.06.2013
Burimi: Gazeta Tema
