Imzot Andon Merdani, Mitropoliti i Elbasanit, Librazhdit dhe Shpatit, merr pjesë në gjelbërimin e Cërrikut dhe rrethinave të tij.
Një iniciativë e tij, për të vizituar këtë Bashki, me popullsi të përzier në besimin fetar, ka bërë që të shtohen sipërfaqet e mbjella me drurë frutorë.
Ai nuk ka preferuar të mbjellë lule apo drurë dekorativë. Ka bërë apel në emër të paqes dhe mirësisë, për të mbjellë ullinj.
“Ulliri është pemë e paqes dhe e bekuar nga Perëndia, ndaj u bëj thirrje që këtë pemë të bekuar ta mbjellim në çdo pjesë toke që nuk prodhon grurë”,- ka qenë thirrja e tij në një takim me qytetarë e drejtues të kësaj Bashkie.
Thirrjes së tij i janë përgjigjur dhjetra të rinj e të reja nga ky qytet. Por më së shumti banorë të Shtërmenit, Gostimës e Sulovës, që janë kultivues të ullirit.
Mitropoliti i Elbasanit: Mbillen afro 500 rrënjë drurë ulliri
Jo pak, por afro 500 rrënjë drurë ulliri janë blerë nga adhuresit e Mitropolitit, për t’i mbjellë ato para dy ditësh.
Besimtaret u angazhuan në dhurimin e fidanëve të pemëve të ullirit, kajsive dhe selvive, për t’u mbjellur fillimisht në hapsirën që rrethon kishën e Shën-Dhimitrit e më pas në sipërfaqe të lira.
Për të përshëndetur këtë inisiativë, ishte i pranishëm edhe kryetari i Bashkisë, Cërrik, z Altin Toska, i cili përgëzoi besimtarët dhe Hirësinë e tij Andoni.
Vetë Hiresia e tij, Andoni, mbolli një pemë simbolike.
Më pas rituali i mbjelljes së ullinjëve kaloi në kishën “Lindja e Krishtit” në qytetin e Cërrikut. Aksioni u mbyll me një vizitë në Bashkinë e këtij qyteti, ku merrnin pjesë edhe At Petraq Dedja dhe prifti i Elbasanit At Petro Halili.
Kreut të Bashkisë, Altin Toska, iu dhuruan edhe disa botime të Kishës Orthodhokse Autoqefale të Shqipërisë.
Kjo është vizita e parë e Mitropolitit të Elbasanit në një qytet si Cërriku, ku popullsia ortodokse është në minorancë, por në vëllazëri me atë myslimane në shumicë.
Alfrida Danushi
18.01.2018
