“Mirënjohja e Qytetit” për një grua në Ditën e Gruas…
8 Marsi është festuar ndryshe në Bashkinë e Elbasanit. Jo për atë që nëpunëset e këtij institucioni kishin “braktisur” zyrat në këtë ditë feste, por për një veprimtari, që mbetet shumë domethënëse në këtë ditë të shënuar.
Një zonjë që gjithë jetën ia ka kushtuar ndihmës së grave të dhunuara, është nderuar me një titull të lartë. “Mirënjohje e Qytetit” është dhënë sot për Dhoksa Gjokën, drejtuese e një shoqate në ndihmë të grave.
Kryebashkiaku, Sejdini, ia ka dhënë vetë çmimin, Znj.Dhoksa Gjoka, “Mirënjohje e Qytetit”. “Për përkushtim të jashtëzakonshëm dhe pasion të pakrahasueshëm për t’i shërbyer të tjerëve, veçanërisht grave.
Një grua që ka kapërcyer vështirësi, përmes punës së saj, si aktiviste e palodhur, është shembull frymëzimi për të tjerët”. Ky ishte motivacioni për këtë grua të palodhur, që vazhdon të frymëzojë vajza e gra për të luftuar fort për të drejtat e tyre.
Alfrida Danushi
08.03.2019
