Kryetari i Lëvizjes Socialiste për Integrim akuzoi sot Qeverinë se ka lënë në harresë qarkun e Dibrës, ndërsa shprehu bindjen se më 23 Qershor dibranët do të ndëshkojnë me votë këtë qeverisje. “Sot jam i trishtuar jo për politikën, por për lidhjet e mia të veçanta me Dibrën sepse unë kam qënë në gjithë Shqipërinë, por nga ato që kam parë Dibra është qarku më i harruar nga qeveria Berisha sa i përket infrastrukturës. Edhe pas 8 vitesh dibranët kanë vetëm 2-3 orë ujë në ditë dhe qyteti i Peshkopisë nuk e meriton këtë situatë. Prandaj ka ardhur koha që meqë Berisha nuk e zgjidhi as problemin e ujit, dibranët ti japin Berishës ujë me bisht të lugës dhe jo vota”, iu drejtua Meta të pranishmëve.
Meta ishte i pranishëm në një takim electoral ku prezantoi kandidatët e LSI për deputet në këtë qark, ndërsa apeloi që votuesit dibranë të ndëshkojnë me votë Kryeministrin Sali Berisha. Ai akuzoi PD-në se po u bën presion qytetarëve për t`u marrë votën në 23 qershor. ‘Kjo qeveri nuk bëri sa minimumin e mundshëm për të treguar kujdesin dhe vëmendjen ndaj të gjithë juve. Por tani edhe shenjën e mirënjohjes që shumica e Dibrës i ka dhënë PD-së, po ua shpërblejnë me presionet nga më të ultat për të marrë me dhunë votën tuaj e cila duhet të jetë e lirë dhe duhet të jetë për fëmijët tuaj dhe jo nga këta dhunues që kishnin në dorë të bënin më shumë për Dibrën”, tha Meta.
Ai premtoi se me ardhjen në pushtet të opozitës së bashkuar do të përfundojë ndërtimi i Rrugës së Arbërit. “Është koha për rrotacion, është koha për ndryshime të fuqishme të cilat e bëjnë realitet brenda mandatit të ardhshëm Rrugën e Arbrit, që ajo të mos vazhdojë të mbetet një legjendë dhe të mos tregohet në historira dhe në barcaleta. Është koha për një reflektim, për t’u bashkuar me ndryshimin e sigurtë që Shqipëria do të hyjë në 23 qershor. Është koha për të mbështetur LSI-në si forcën më realiste, si forcën me një vizion dhe me një shpirt europian, e cila ka treguar se di të vërë interesat e vendit mbi interesat e saj dhe ka të gjithë energjitë për ta ndihmuar Dibrën dhe Shqipërinë për të ecur më shpejt. Ta vëmë Dibrën dhe Shqipërinë në punë, votoni LSI-në”, u shpreh Meta.
Në vijim ai theksoi se LSI-ja ka si prioritet në programin e saj çështjen e punësimit dhe sipas tij të gjitha politikat programore janë në funksion të punësimit. Kreu i LSI-së shprehu mbështetjen e forcës politike që drejton për fermerët, minatorët dhe fasonët, sikundër theksoi se kjo provohet edhe nga nismat e miratuara nga Qeveria pas kërkesave të vazhdueshme të LSI-së.
Në fjalën e tij, Meta komentoi edhe largimin e Kryetarit të Bashkisë së Kukësit nga PD-ja dhe bashkimin e tij me LSI-në. “Pak ditë më parë Kryetari i Bashkisë së Kukësit u distancua nga PD, sepse është bërë një investim 4 milionë euro për të zgjidhur problemin me ujin e pijshëm, por ujë nuk kishte. Atij i kërkuan të priste shiritin e ujësjellësit dhe ai nuk pranoi. Prandaj është koha të bashkoheni me LSI-në” u shpreh Meta.
03.06.2013
Burimi: Grid.al
