TIRANE – Ky gjimnaz nuk është një pikë ku ti mund të plotësosh Formularin A3. Ke vetëm nëpër rrethe”. Kjo ishte fjalia e parë që dëgjuam nga goja e një prej mësueseve të gjimnazit “Ismail Qemali” në kryeqytet, kur e pyetëm në lidhje me plotësimin e Formularit A3. Edhe pse Ministria e Arsimit dhe Shkencës e ka renditur këtë shkollë si një nga institucionet e arsimit publik, ku mund të drejtohen të gjithë maturantët që kanë probleme me plotësimin online të këtij formulari, mesa duket stafi i kësaj shkolle “nuk e ka kuptuar” si duhet udhëzimin e ministrit. Pasi i bëjmë të kuptojë se e kemi informacionin e duhur (pa i treguar se jemi gazetarë) dhe se gjimnazi “Ismail Qemali” është një prej dy pikave të paracaktuara nga MASH (përveç shkollës “Arben Broci”) mësuesja filloi të pranonte faktin se atje mund të aplikohej. Megjithatë arroganca e saj vazhdonte të ishte prezente në bisedë, ndërsa ne nuk po arrinim të kuptonim se përse vinte kjo sjellje. “Pse nuk e plotëson online formularin po vjen këtu? Se jeni mësuar ju mbetësit… I bini rrugës për shkurt, t’ua bëjnë të gjitha gati”, – na drejtohet sërish mësuesja. I shpjegojmë se gjatë plotësimit online në mënyrë individuale kishim hasur probleme dhe se na nevojitej asistenca e një specialisti. “Po kuponin e internet-kafesë, ku keni provuar plotësimin online e keni?”, – na drejtohet. Me thënë të drejtën udhëzimin e plotësimit të Formularit A3 e kemi lexuar me vëmendje dhe në të nuk ka asnjë përcaktim në lidhje me “kuponin” e për më tepër nuk e dimë nëse ekziston një i tillë. “Jo”, – i themi, ndërsa mësuesja ngre supet si për të na treguar se s’kishte ç’të bënte. Në atë moment ndërhyn një mësuese tjetër, e cila merr përsipër të na drejtojë drejt klasës ku mund të plotësohej formulari. Shkojmë te klasa përkatëse dhe pyesim një mësuese të tretë, por edhe ajo me të njëjtin ton na thotë se jemi shumë vonë. Në fakt ora shënonte 14:45, që do të thotë se të paktën orari zyrtar i punës për administratën nuk kishte përfunduar ende. Megjithatë, për t’u treguar korrektë e pyesin se në çfarë ore mund të paraqitemi të nesërmen. “Pfff, hajde në 9”. Në atë moment ndërhyn mësuesja tjetër, që na shoqëroi e që për hir të së vërtetës kishte një komunikim normal, ndryshme nga të tjerat. “Aplikimi zyrtar mbyllet në orën 24:00. Deri atëherë keni kohë për aplikim”, – na sqaron. “Ç’a ore 24 mi? Kush do e presë këtë këtu deri në atë orë? – e ndërpret sërish mësuesja e klasës – deri në 12, maksimumi 1 (13:00) mund të vish”. Përfundimisht kuptuam se ishte e pamundur për të komunikuar dhe se edukata në institucionet tona arsimore nuk është se të ndihmon shumë. Ajo që është e rëndësishme për t’iu thënë të gjithë nxënësve që duan të plotësojnë Formularin A3 është se kanë afat deri sot në orën 24:00 për ta plotësuar online individualisht, ndërsa nëse kanë ndërmend të asistohen nga specialistët, të shkojë tek gjimnazi “Ismail Qemali” sot në orën 09:00!
02.11.2012
Burimi: Balkanweb
