Një analizë ekskluzive nga Mentor KIKIA: Prova e madhe e drejtësisë për peshqit e mëdhenj!
Diplomatët e huaj, pasi na shtrënguan me “kamzhik” në dorë për të miratuar ligjet e reformimit të sistemit të drejtësisë, tashmë kanë vendosur afate konkrete se kur duhet të fillojnë arrestimet e “peshqve të mëdhenj”.
Jo më larg se tremujorin e parë të vitit 2018, tha ambasadori amerikan Donald Lu.
Si përherë, ai u tregua i drejtëpërdrejtë kur deshi të konfirmkonte deklaratën se krimi ka ambasadorët e tij në politike, duke iu referuar disa syresh ish deputetë që tashmë janë ose në burg, ose jashtrë parlamentit, apo në detyra partiake si Rroku, Frroku, Rroshi etj.
Struktura më e re për luftën kundër krimit të organizuar, ka në përbërjen e saj edhe disa ekspertë të FBI-së, si një garanci e panshmërisë së saj në luftën ndaj peshkaqenëve, por edhe si garanci që kjo strukturë të mos bjerë pre e sulmeve politike, siç rëndom ndodh këtu.
Por pyetja që ne bëjmë është: A do të arrestohen vërtet zyrtarë e ish zyrtarë të lartë që janë implikuar në krime apo në afera korrupsioni? Deri tani ne vetëm kemi numëruar dështimet dhe zhgënjimet.
Kemi parë se si peshkaqenët edhe kur bien në rrjetë, që në fakt më shumë kanë qenë rrjeta që i kanë hedhur njëri-tjetrti sesa rrjeta të drejtësisë, sërish e kanë çarë atë e kanë ikur. Kjo praktike shkaktoi në mënyrë sistematike tek shqiptarët humbjen e besimit tek drejtësia, humbjen e besimit të politika dhe përfundimisht humbjen e besimit edhe tek vetë vendi i tyre.
Tani jemi para një shprese.
Unë seriozisht shpresoj që sistemi do të tronditet. Dhe shpresa është e bazuar vetëm në rolin e ndërkombëtarëve dhe vetëm pasi drejtësia të jetë “rikonstruktuar”. Dhe jo me kot Lu vendosi si afat tre muajt e parë të vitit 2018. Kohë kur do të kenë përfunduar së ndërtuari edhe strukturat e reja që do të bëjnë emërimet ne gjyqësor dhe prokurori.
Por këto limite kohore, aq sa japin shpresë, aq janë edhe me rriskt, pasi nëse deshtojnë, nuk bëjnë gjë tjetër veçse shtojnë pezmin publik në këtë shoqëri të traumatizuar. Pasi ne kemi degjuar tre vjet me radhë kryeprokurorin tonë të na thotë se në vjeshtë do të ketë arrestime të mëdha që do të trondisin politikën. Pastaj vinte vjeshta tjetër dhe thoshte të njëjtën gjë, e përfundimisht as në vjeshtë e as në dimër nuk u arrestua asnjë i madh e asnjë i vogël që qëndron pranë të mëdhenjve.
Ndaj reformimi dhe fillim i punës nga strukturat e reja të drejtësisë dhe kërkesa ultimative e Lu-së për arrestimin e peshqve të mëdhenj është një provë e madhe. Ajo është një provë para shqiptarëve në radhë të parë, pastaj para drejtësisë.
07.11.2017
