Mbërrin në atdhe trupi i pajetë i Lirak Bejkos, martirit të grevës së urisë të ish-të përndjekurve politikë. Babai i tre fëmijëve humbi jetën 4 ditë më parë në një spital në Bari të Italisë, ku trajtohej për plagët që pësoi nga vetëdjegia me benzinë. Arkmorti me trupin e Bejkos ka mbërritur mëngjesin e sotëm në portin e Durrësit, me tragetin e linjës Bari-Durrës, ndërsa është pritur nga familjarët dhe miqtë e e tij. Pak minuta më parë, Laku siç e njihnin njerëzit e afërt, është rikthyer i pajetë në shtëpinë ku lindi dhe u rrit.
Morti në familjen Bejko është hapur qysh prej mesditës së të premtes, kur mjekët u telefonuan familjarëve dhe u komunikuan lajmin e hidhur se Liraku nuk ia kishte dal dot mbanë. Zemra e tij kishte pushuar rreth orës 11:20 të së premtes. Pranë tij nuk ndodhej asnjë i afërm, pasi bashkëshortja dhe familjarët e tjerë nuk mund të përballonte dot shpenzimet e udhëtimit. Ceremonia e varrimit është parashikuar të zhvillohet nesër, pas zhvillimit të homazheve në Institutin e Integrimit të Ish-të përndjekurve politikë. Pas diskutimesh dhe përplasjesh të shumta, është arritur marrëveshja që homazhet në nderim të Bejkos të mbahen nga ora 11:00-13:00, e më pas ai do të përcillet për në banesën e fundit .
Miku i tij, ish-koordinatori i grevës së urisë së ish-të përndjekurve politikë Skënder Tufa, deklaroi se në ceremoni nuk është i mirëpritur asnjë politikan dhe se janë marrë të gjitha masat që të shmangen incidentet. Ai ka deklaruar se është anuluar vendimi për të çuar arkivolin e Bejkos përpara godinës kryeministrore, sepse nuk duan të krijojnë tensione apo përplasje me policinë.
Lirak Bejko u vetëdogj me benzinë teksa ishte ngujuar në një grevë urie me disa ish-të përndjekur politikë. Në shenjë proteste për shurdhësinë e qeverisë ndaj kërkesave të tyre ekonomike dhe pas akuzave që iu adresuan grevistëve, ai u lye me benzinë dhe i vuri flakën vetes. Bejko pësoi dëmtime të rënda në më shumë se 50% të trupit. Ai u transportua në një klinikë në Bari për trajtim më të specializuar, ku iu nënshtrua disa ndërhyrjeve kirurgjikale. Pak para mesditës së datës 2 nëntor ai ndërroi jetë.
6 nëntor 2012
Burimi: Gazeta Shqip
