TIRANE- Kur ende nuk ka mbyllur hesapet me drejtësisë për fshehjen e 3.7 milionë eurove, biznesmeni Vaid Tarja, vihet nën një tjetër akuzë. Njësia e specializuar ‘task-forcë’ pranë Prokurorisë së Tiranës, ngriti mbi supet e biznesmenit akuzën e mashtrimit, pasi i mori një ndërtuesi shumën prej 83 mijë eurosh, me premtimin se do t’i siguronte një kontratë me kompaninë ‘Bechtel Enka’. Më poshtë po botojmë të plotë kërkesën e prokurorisë…
Dosja e prokurorisë
Sipas prokurorisë, M.E. në muajin shtator 2009 ka hapur një aktivitet privat në fushën e ndërtimit dhe shkak ka qenë pikërisht njohja me të pandehurin Vaid Tarja. I pandehuri Tarja i ka premtuar atij, se do t’i siguronte një kontratë pune me firmën ‘Bechtel Enka’ dhe kundrejt kontratës, i ka kërkuar rreth 83 mijë euro. Në vazhdim të kësaj marrëveshje Tarja i ka paraqitur M.E. një kontratë të hartuar, gjithmonë sipas Vaidit, nga përfaqësuesit e firmës ‘Bechtel Enka’. Sipas kësaj kontrate M.E. do të kishte cilësinë e kontraktorit. Pas këtij momenti Vaid Tarja e mbante M.E. me shpresën e mungesës se fondeve nga ana e firmës ‘Bechtel Enka’, duke i thënë se ka patur avari në këtë shoqëri për shkak se u është shembur tuneli i rrugës Durrës-Kukës. Më vonë, Vaid Tarja i ka thënë M.E. se shuma prej 360 mijë euro ka kaluar në llogarinë e tij bankare në degën e bankës xxx në Vorë. Punonjësit e bankës e kanë mohuar një fakt të tillë dhe pikërisht në këtë kohë, M.D. i ka kërkuar të pandehurit dokumentin përkatës të transfertës së parave. Nga hetimet ka rezultuar se Vaidi ia ka dërguar nëpërmjet internetit shtetasit A.A., këtë transfertë të cilën kallëzuesi M.E. e ka marrë dhe e ka paraqitur në bankën xxx Vorë. Por nuk ka zgjatur shumë dhe më vonë, Tarja i ka thënë M.E. se ai nuk mund ta merrte punën e premtuar dhe se ai do i kthente të gjithë shumën e parave të marra atij. Pas shumë insistimeve nga ana e E.M. u tha hetuesve se i pandehuri i ka kthyer gjysmën e shumës së parave. Vetë Vaid Tarja, pretendon se e ka kthyer të gjithë shumën e parave. M.E. më vonë ka mësuar se kontrata si dhe dy transfertat e parave ishin falso.
Falsifikimi i kontratave
Sipas organit të hetimit, kontrata e cila ka shërbyer si mjeti me anë të së cilës Vait Tarja ka hedhur në dorë shumën e parave si dhe dy transfertat e parave i janë nënshtruar ekspertimit nga i cili ka rezultuar ndër të tjera se, “Shkrimi emër-mbiemër B.K., gjendur në dokumentin fotokopje “Kontratë në gjuhën angleze dt. 26.08.2009, e nënshkruar në emër të B.K. dhe M.E. Elezi objekt ekspertimi mund të jetë shkruar nga shtetasi Vait Tarja. Në këto kushte, prokuroria ka ngritur ndaj tij akuzën e mashtrimit duke dorëzuar dosjen penale ndaj tij për gjykim në Gjykatën e Tiranës. Në dosjen e prokurorisë thuhet se, ‘Përdorimi i gënjeshtrës me qellim marrjen e parave si dhe sjellja e të pandehurit Vait Tarja pas marrjes se parave shpjegon qartë faktin se i pandehuri ka pasur qëllim që në fillim hedhjen në dorë të pasurisë së M.E. në mënyrë të kundraligjshme’. Mënyra e kryerjes se veprimeve të të pandehurit – shprehet prokuroria – është tregues i faktit se jemi para veprës penale të mashtrimit pavarësisht faktit nëse është kthyer apo jo shuma e parave të marra nëpërmjet gënjeshtrës.
23.02.2013
Burimi: Balkanweb