Mashtrimi që i bën vëllai të motrës për 25 mijë euro
Ndodh në Tiranë, vëllai i merr motrës 25 mijë euro dhe e kërcënon: Ta nxjerr qumështin e nënës.
Gjykata e Tiranës dënon me 3 vjet e 4 muaj burgim 54 vjeçarin. Ai shpallet fajtor për veprën penale të “mashtrimit”.
Vendimi është dhënë me 5 tetor të këtij viti, ndërsa ngjarja ka ndodhur në tetor të vitit 2014.
Sipas vendimit të Gjykatës, Adem Sh. i ka marrë motrës, me anë të mashtrimit, 25 mijë euro. Ai nuk ia ka kthyer mbrapsht borxhin, por ka pretenduar sikur nuk ia ka marrë kurrë ato para.
Pas shumë seancash gjyqësore, Adem Sh. e ka pranuar fajin. Ai është dënuar me 5 vjet burgim. Ky dënim konvertohet më pas në 3 vjet e katër muaj burg, për shkak të gjykimit të shkurtuar.
Sipas dosjes hetimore, më datë 24 tetor të vitit 2016, motra e të pandehurit, V.Xh., ka bërë kallëzim pranë Prokurorisë.
Ajo pretendon se nga mashtrimi i kryer nga vëllai i saj, ka humbur një vlerë monetare prej 25 mijë eurosh.
Vëllai, Adem Sh. kishte pretenduar se paratë i nevojiteshin për të rinovuar banesën dhe për nënën e sëmurë.
Borxhi është dhënë në vitin 2014, ndërsa kallëzimi është bërë pas dy vitesh përpjekje për të rimarrë paratë.
Sipas dëshmisë së motrës në Prokurori, ajo i ka kërkuar vëllait shumën e dhënë, por ai, jo vetëm që nuk ia ka kthyer, por ka mohuar t’i ketë marrë para.
Madje, ai e ka kërcënuar motrën e tij, duke i thënë se do ta çonte te “17-ta (Spitali Psikiatrik)” dhe se do t’ia nxirrte qumështin e nënës.
Motra e të pandehurit ka bërë të gjitha përpjekjet edhe me persona të tjerë të familjes për të marrë mbrapsht paratë. Ndërsa, vëllai i saj, Adem Sh. e ka mohuar gjithnjë marrjen e kësaj shume.
I pyetur në Prokurori, Adem Sh. ka thënë se nuk ka marrë kurrë para nga motra e tij. Të vetmet para që ka marrë borxh, kanë qenë të marra në formë kredie në një bankë.
Në Gjykatë është bërë edhe një ballafaqim mes të pandehurit dhe dy motrave të tjera të tij. Këto të fundit kanë mbajtur të njëjtin qëndrim me motrën që dha paratë.
I ndodhur në këto kushte, i pandehuri ka pranuar fajin dhe se ka marrë 25 mijë euro nga motra e tij. Ndërsa, ai ka mohour qëllimet e marrjes së parave të pretenduara në fillim. Ai ka kërkuar nga Gjykata e Tiranës gjykim të shkurtuar dhe ka shfaqur pendesë.
Në këto kushte, Gjykata e dënoi atë me 3 vjet e katër muaj burgim, për veprën penale të “mashtrimit”.
