Masa të forta sigurie nga ana e  Drejtorisë Vendore të Policisë Elbasan për ndeshjen e nesërme Skëndërbeu  – Partizani i Beogradit. Këto kanë për qëllim sigurimin e rendit dhe qetësisë, për zhvillimin sa  më normal,  para, gjatë dhe deri në përfundim të ndeshjes ndërkombëtare të futbollit nëpërmjet ekipeve  përfaqësuese  “Skëndërbeu”  – “Partizani i Beogradit”,  e cila do të  zhvillohet  më  datë  19.10.2017,  në  orën  21:05,  në Stadiumin  “Elbasan  Arena.” Policia e Elbasanit bën me dije se duke filluar nga ora 17:00, datë 19.10.2017 , nuk do të lejohet parkimi i mjeteve përreth dhe para sheshit të  stadiumit “Elbasan Arena”, nga Kryqëzimi i Bulevardit “Qemal Stafa” me  rrugën “Kamber Sejdini” deri në dalje në unazë . Ndërsa nga  kryqëzimi i Bulevardit “Qemal Stafa ” deri në dalje në unazë  do të jetë për parkimin e mjeteve të tifozëve vendas.

Gjithashtu , do të bllokohet rruga “Kamber Sejdini” nga  Kryqëzimi i  Bulevardit “Qemal Stafa” deri tek Kryqëzimi i Tapetave , nga bulevardi “Aqif Pasha”,  nga Stadiumi deri te Kryqëzimi i Shatërvanit, nuk do të lejohet  parkimi dhe lëvizja e mjeteve. Për të mos krijuar kaos në qarkullim , sipas të njëjtit burim, lëvizja e mjeteve do të bëhet nëpërmjet Unazës së qytetit. Ndërkohë, aksi rrugor,  nga Kryqëzimi i Tapetave,   ish-Konservim,  deri  në dalje në unazë  për në  “5 Maj”, në drejtim të Spitalit, do të shfrytëzohet për emergjencat që mund të lindin gjatë zhvillimit të këtij aktiviteti.

Lidhur me ndeshjen, do të angazhohen 221 punonjës policie nga  Drejtoria  Vendore  e  Policisë  Elbasan, Komisaraitet, Stacionet Policore vartëse të saj, Forcat e Posaçme Shqiponja.

Kreu i uniformave blu në Elbasan, urdhëron që të  gjithë sportdashësit,  që do të  marrin pjesë  në këtë aktivitet,  të  jenë   të  pajisur  me biletë dhe me  kartë  identiteti   dhe  të  mos kenë  me vete:  sende të forta, shishe (të  çfarëdolloji),  fishekzjarre, monedha  apo  metale  (të  cfarëdolloji) , çelësa  të  ndryshëm, apo banderola me mbishkrime nxitëse dhe raciste, në të kundërt nuk do të lejohen   të  futen  në stadium. Në përfundim të këtyre masave me karakter organizativ dhe sigurues, jepet porosi se në  hyrje   të  stadiumit  do  të  kontrollohen të  gjithë  sportdashësit dhe njoftohen administratorët e  bizneseve, që zhvillojnë aktivitet tregtar  përreth dhe në afërsi të  Stadiumit, se  nga ora 17:00 e deri  në  përfundim  të   ndeshjes , të tregohen mirëkuptues duke mbyllur aktivitetet e tyre.

Policia vendore përfundon urdhëresën duke falenderuar qytetarët për mirëkuptimin dhe mediat për bashkëpunimin!

18.10.2017

Për Lajm-Shqip
Alfrida Danushi