Lëvizja Socialiste për Integrim, që drejton Ministrinë e Jashtme, e pranon më në fund që ka një memo të qeverisë amerikane për qeverinë shqiptare, ku i kërkohet që të hiqet dorë nga tonet nacionaliste.
Petrit Vasili, nënkryetari i LSI-së dhe Bashkisë, tha se memoja duhet lexuar me gjakftohtësi.
Të habit ky qëndrim i tij, kur një ditë më parë ishte Ministri i Jashtëm, Edmond Panariti që tha se nuk ekziston një memo e tillë.
“Memo duhet lexuar me gjakftohtësi dhe dashamirësi dhe gjithçka që ekziston në shqetësimin e drejtpërdrejtë, të tërthortë apo të nënkuptuar duhet analizuar në çdo pjesë të saj. Mendoj që politika shqiptare është kaq e re në zhvillimet e saj dhe besoj që ka gjithmonë për të reflektuar nga një politikë e madhe, siç është politika amerikane, ndaj këqyrja me modesti dhe me mendje të ftohtë e çdo sinjali apo vlerësimi që vjen nga Amerika është besoj qëndrimi i duhur dhe i vetëm që mund të bëhet në këtë rast,” tha Vasili.
Ndërkohë, mediat e huaja vazhdojnë të bëjnë jehonë për memon e publikuar nga mediat shqiptare.
Edhe mediat serbe kanë transmetuar këtë memo. Tanjug dhe B92 kujtojnë se bëhet fjalë për një memo ku i kërkohet qeverisë shqiptare që të qëndrojë larg çështjeve të brendshme të Serbisë.
BIRN shkruan se: “Nën sulm, me pak suksese për të treguar përpara zgjedhjeve të ardhshme parlamentare, Berisha po i apelon gjithmonë e më shumë ndjenjës panshqiptare”.
Ndërkohë ambasada amerikane nuk ka komentuar edhe për BIRN çështjen e memos, duke thënë se nuk komentojnë për shkëmbimet diplomatike.
17.02.2013
Burimi: Gazeta Tema
