Një ditë pas ftesës publike të kryesocialistit Edi Rama, gjatë konferencës së tij në “Twitter”, krerët e FRD-së dhe LSI-së e refuzuan atë, duke mos preferuar të bëhen palë në shtimin e mëtejshëm të problemeve. Nga Kruja, kreu i FRD-së, Bamir Topi, paralajmëroi dje se, partia që ai drejton do të bëjë koalicion për zgjedhjet e viti 2013, vetëm mbi bazën e vlerave dhe parimeve. Për Topin, çështja kombëtare është përparësi e FRD-së, ndërkohë që ekonomia dhe mirëqenia e qytetarëve mbeten në përparësi.
Ndërsa, kreu i LSI-së, Ilir Meta, në mënyrë indirekte la të nënkuptohej një refuzim nga ana e tij i ftesës së PS-së, për bashkëpunim. Meta duke folur gjatë mbledhjes së parë të kryesisë së LSI-së thase, nuk mund të bëhet palë me asnjë forcë politike, pasi forca e tij politike është për të zgjidhur probleme dhe jo për t’i shtuar ato. “Dua të nënvizoj vendosmërinë tonë për të mos u bërë palë me askënd dhe kundër kurrkujt, të çdo lloj konflikti absurd dhe politik, por për të qenë gjithmonë një alternativë me kërkesa më të larta ndaj vetes dhe njëkohësisht, me kërkesa më të larta për perspektivën e vendit dhe të mbarë qytetarëve tanë. Ne do të jemi të angazhuar për të rritur standardet e komunikimit publik dhe politik, si dhe për ta orientuar politikën drejt zgjidhjes së problemeve dhe jo drejt krijimit të problemeve të reja, apo riaktivizimit të plagëve të vjetra të politikës shqiptare”,- u shpreh Meta, teksa uroi anëtarët më të rinj të konventës.
08.01.2013
Burimi: Gazeta Shekulli
