Listat e zeza të PD-së
Qindra punonjës administrate. Nga pastrueset, te zyrtarët e lartë. Të gjithë të skeduar. Nga ata që janë kontaktuar dhe janë paraqitur te zyra e partisë, nga ata që janë kontaktuar, por që nuk janë paraqitur, deri te ata që janë kontaktuar, por që nuk pranojnë pjesëmarrjen në fushatë, apo ata që duhen rikontaktuar. Të gjitha këto vetëm në një grup seksioni të PD-së. Dokumentet zyrtare të siguruara nga “Fiks Fare” në Top Channel tregojnë aktivitetin e ethshëm partiak për të sigu-ruar votat, në grupseksionet 1857 në njësinë numër 6 te shkolla “Myslym Keta” me 2390 zgjedhës dhe 1858 po aty, me 1491 zgjedhës dhe që të dyja janë në zonën e Kombinatit dhe që janë prova e pakundërshtueshme e akuzave të bëra për qeverinë se prej muajsh po përdor gjithçka për të siguruar votat e punonjësve të administratës. Listat e PD-së janë të hartuara me shumë kujdes, duke shënuar gjeneralitetet e punonjësit të administratës, vendin e punës, përshkrimin e punës, Kodin e Qendrës së Votimit si dhe numrin e telefonit. Lista e atyre që janë kontaktuar dhe kanë pranuar që të paraqiten pranë zyrës elektorale të PD-së, shkon në 41 punonjës. Janë infermierë, punëtorë krahu, ushtarakë, policë, mësues filloreje, shoferë, policë trafiku, sanitare, policë bashkiakë, ciceronë në Muzeun Kombëtar, drejtor shkolle, punonjës te Zyra e Kthimit dhe Kompensimi i Pronave.
“Abstenuesit”
Zyrtarët e PD-së kanë përgatitur edhe një listë me 70 punonjës të administratës që janë kontaktuar dhe që nuk janë para-qitur pranë zyrës së PD-së. Janë inxhinerë, profesorë universiteti, mësues, pastruese, sërish policë, një oficer shtabi, një këngëtar opere, fshesare, infermiere, mësues fizike, sërish muzikantë punojnë te Teatri i Operas dhe Baletit, një kimiste te Materniteti i Ri, një kuzhiniere, një mirëmbajtës të mjeteve të aviacionit në repartin 3100, një drejtoreshë administrate te Ministria e Punës, një kontabiliste bashkie, një ushtar, një oficer, një mësues matematike apo një punëtor krahu. Një fletë e veçantë është me 8 punonjës administrate, që sipas PD-së duhen rikontaktuar që të “ftillohen” dhe ata ja-në një kujdestar te Instituti i Fëmijëve që nuk dëgjojnë, një punëtor parqesh, tre ushtarakë, një polic etj.
Refuzuesit
Në një listë të veçantë janë skeduar ata që kanë një numër telefoni, të padisponueshëm, siç duket edhe nga koka e listës që ka hartuar PD-ja. Disa prej tyre punojnë në QSUT, në TOAB si muzikantë, mësues apo profesorë. Por ekziston edhe një listë tjetër, ku janë 3 emra: I një oficeri të forcave ajrore që thotë se nuk i interesojnë partitë politike, një punonjës i policisë ndërtimore në bashki-në e Tiranës që thotë se ka kaluar me LSI-në dhe një infermiere që thotë se është me PS-në.
Lirohen të burgosurit, shumica votues të Halimit
“Fiks fare” ka siguruar edhe disa lista me emra të burgosurish që janë dënuar për vepra të ndryshme penale dhe që vuajnë dënimin në burgje të sigurisë së lartë. Në listën e parë me 23 emra, shumica e të liruarve, që ju jepet leja në muajin qershor, janë banues në Durrës dhe lirohen për disa ditë nga burgu i Rrogozhinës. Edhe në zgjedhjet e kaluara parlamentare të qershorit 2009, ish-ministri i Drejtësisë Alibeaj u akuzua se kishte liruar disa dhjetra të dënuar, për të ndikuar te votimet në zonën e Fierit, ku ai kandidonte.
21.06.2013
Burimi: Shekulli.com
