Sindikata e Punonjësve të Policisë së Shtetit i është drejtuar me një letër kryeministrit Edi Rama, ku parashtrojnë 11 kërkesa për zgjidhje.
Letra i është nisur Ramës më 18 dhjetor e duke qenë se i drejtohej në prag të festave të fundvitit, kërkesa e parë e punonjësve të Policisë ishte paga e 13-të.
Sindikata argumenton se ajo u takon të gjithë punonjësve sipas Kodit të Punës dhe Kontratës Kolektive në fuqi, por edhe marrëveshjes së përbashkët që qeveria ka me sindikatën.
KERKESAT E PLOTA
1. T’u japë pagën e 13-të të gjithë punonjësve të Policisë së Shtetit, pasi kjo u takon sipas Kodit të Punës, Kontratës Kolektive në fuqi dhe marrëveshjes së përbashkët qeveri-sindikatë.
2. Të paguhen orët suplementare dhe dietat e prapambetura për shërbime jashtë rrethi, nga viti 2017 e në vazhdim (Komisariatet e Tiranës nga viti 2016).
3. Në mbështetje të ligjit të bëhet sigurimi i jetës për të gjithë punonjësit e Policisë, në rast aksidenti në detyrë e për shkak të detyrës. Sot kemi mbi 280 të rënë e mbi 300 të plagosur në detyrë e për shkak të detyrës dhe mbi 4 vite janë në pritje për të dalë VKM për të zbatuar ligjin.
4. T’u jepet banesë falas dhe përfitimet e tjera sipas ligjit, pjesëtarëve të familjeve të punonjësve të Policisë që humbin jetën për shkak të detyrës.
5. T’u jepet kompensim për ushqim të gjithë punonjësve të Policisë që nga hyrja në fuqi e VKM nr.189, dt.15.03.2017. Filloi zbatimi i VKM-së në mars të vitit 2018, por u ndërpre si zakonisht për mungesë fondesh.
6. T’u jepen gradat dhe pagat për gradë punonjësve të Policisë që përmbushin kushtet dhe kriteret sipas ligjit për gradën ‘Inspektor i Dytë’ dhe ‘Inspektor i Parë’. Ka një vit pritje nga punonjësit e Policisë dhe asnjë përgjigje.
7. Të jepen, në bazë të ligjit e VKM-së, kredi me 3 për qind për punonjësit e Policisë të pastrehë.
8. Qeveria të bëjë sa më shpejt ndryshimet e nevojshme në ligj për trajtimin e punonjësve të Policisë me pension e shërbime suplementare.
9. Të jepet trajtim financiar për punë të dëmshme.
10. Të ndalohen transferimet pa kriter të policëve, kryesisht kryefamiljarëve.
11. T’u jepen uniformat dhe detyrimet e papaguara
Elona Tereziu
27.12.2018
