Dosja
E hoqi nga puna, 32-vjeçari qëlloi me kallash kryekomunarin
Një 32-vjeçar është vënë nën akuzë nga Prokuroria e Krimeve të Rënda për vrasje në rrethana cilësuese, pasi ka plagosur kryekomunarin e Baldushkut. Altin Shabani, më datën 3 qershor të këtij viti, rreth orës 21:45, në fshatin Baldushk, ka tentuar të vrasë me armë zjarri Elmi Allmuçën, ndërkohë që ky i fundit ishte duke u kthyer në shtëpi me automjetin e tij me targë TR 7531U. “Pas kryerjes së veprimeve hetimore është konkluduar se motivi i kryerjes së kësaj vepre penale prej të pandehurit Altin Shabani, ka qenë pakënaqësia e tij në lidhje me largimin nga vendi i punës si punonjës i policisë së qeverisjes vendore në Komunën Baldushk, prej të dëmtuarit Elmi Allmuça”, thuhet në dosjen hetimore, e cila ka shkuar në gjykatë. Sipas saj, në këto kushte, duke qenë se nga hetimet është konkluduar se vrasja është kryer për shkak të funksionit që kryente shtetasi Elmi Allmuça, i cili disponon mbrojtje të veçantë ligjore si funksionar publik, arrihet në konkluzionin se i pandehuri ka konsumuar elementët e veprës penale të “vrasjes në rrethana të tjera cilësuese”.
Rinas
Aksidentohet shefi i trafikut rrugor të Lezhës
Shefi i trafikut rrugor të Lezhës, Marjan Laca, është përfshirë në një aksident automobilistik. Fatmirësisht 38-vjeçari është jashtë rrezikut për jetën dhe nga aksidenti ka marrë vetëm disa plagë të lehta. Ngjarja është shënuar pasditen e së premtes, në hyrje të Aeroportit të “Rinasit”, ku mjeti me të cilin udhëtonte shefi i qarkullimit rrugor, ka humbur kontrollin, e për pasojë ka dalë nga rruga. Në vendngjarje ka shkuar Policia e Tiranës, e cila ka nisur hetimet për zbardhjen e rrethanave të ngjarjes. Paraprakisht dyshohet se mjeti i Lacës, ka pësuar një defekt ku i ka plasur goma. Kjo ka shkaktuar humbjen e kontrollit dhe daljen e makinës jashtë rrugës.
Aksidenti
Tiranë, makina përplas motorin, një i vdekur
Një aksident i rëndë automobilistik me pasojë një të vdekur dhe një të plagosur është shënuar në orët e para të mëngjesit të së premtes në kryeqytet. Burime nga policia bënë të ditur se ngjarja e rëndë ka ndodhur në rrugën e “Barrikadave”, ku automjeti tip fuoristradë, ka përplasur një motor në të cilin udhëtonin dy persona. Si pasojë, ka gjetur vdekjen, Edison Alushi 22 vjeç, ndërsa është plagosur rëndë, Bilbil Aga. Në vendin e ngjarjes ka shkuar policia, e cila ka nisur hetimet për zbardhjen e plotë të shkaqeve të aksidentit të rëndë. Nga hetimet paraprake dyshohet se shkak mund të ketë qenë shpejtësia me të cilën udhëtonte drejtuesi i automjetit, i cili tashmë është ndaluar nga policia.
31.12.2012
Burimi: Gazeta Shqip
