TIRANE – Pas një seancë të gjatë parlamentare është miratuar me 69 vota pro, 0 kundër dhe 0 abstenim, buxheti faktik i vitit 2011. Por buxheti është shoqëruar me debate të shumta mes maxhorancës dhe opozitës.
Kreu i grupit parlamentar të PS-së, Gramoz Ruçi, ka replikuar me Kryetaren e Kuvendit, Jozefina Topalli, duke deklaruar se mungoi kuorumi për aktin normativ, pasi, sipas tij, nuk miratohet me 69 vota, por me 71. Ndërkohë, Topalli i është përgjigjur me: “Faleminderit zoti Ruçi, votimi është në përputhje me rregulloren dhe ligjin, flisni kot.”
Gjithashtu, në seancë nuk kanë munguar debatet dhe diskutimet as për aktin normativ, që bashkitë të shlyejnë borxhet e ujësellësit dhe energjisë, ku deputetët e PS kanë dalë kundër këtij akti.
Është ratifikuar me 121 vota pro, asnjë kundër, marrëveshja me Austrinë për ekspozimin për herë të parë në Shqipëri të përkrenares dhe shpatës së Heroit tonë Kombëtar, Gjergj Kastriot Skënderbeu, të cilat gjenden në Muzeun Historik të Vjenës. Muzeu Historik Kombëtar do të jetë institucioni pritës i objekteve dhe nënshkrues i marrëveshjeve teknike ndërmjet palëve. Shteti pritës njeh pronësinë e shtetit dërgues të objekteve, ndërkaq që përcaktohet se me përfundimin e ekspozimit çdo objekt do të kthehet në shtetin e origjinës.
Bode për ish-të persekutuarit
Lidhur me ish-të persekutuarit, ministri i Financave, Ridvan Bode, deklaroi në seancë plenare se janë paguar 881 839 139 lekë për këstin e dytë. Për qeverinë, vijon ndarja e këstit për të gjithë pjesën tjetër. Lidhur me pyetjen tjetër të deputetëve se çfarë përfitimesh të tjera ka pasur kjo shtresë përveç përfitimeve të fundit, ministri Bode tha se janë shpërndarë për kategorinë e ish-të dënuarve dhe të burgosurve politik respektivisht lekë të ndara nga banka 2 miliardë 64 400 780 lekë të paguara në atë kohë. Njëkohësisht janë shpërndarë lekë privatizimi 17 miliardë e 512 milion e 975 mijë e 587 lekë privatizime për ish-të përndjekurit politikë. Deri më datën 4 korrik 1997, kur ka qenë akti i fundit i trajtimit të kësaj shtrese sipas një vendimi të qeverisë së kohës, janë privatizuar me lekë privatizimi në masën 4.7 miliardë lekë 2824 objekte, ndërmarrje të vogla dhe të mesme me lekët e privatizimeve. Kjo është ajo që disponoihet lidhur me dëmshpërblimin e ish-të përndjekurve politikë.
19.10.2012
Burimi: Gazeta Shekulli
Kuvendi miraton buxhetin faktik me 69...
