Edi Rama nuk përmendi konkretisht se kush ministra do të lëvizin në shtator, por gjithsesi ai dha një indikacion. Kryeministri tha dje në mbledhjen e Asamblesë së PS-së se ata ministra që nuk mbajnë dot dy bostanë nën një sqetull, siç ndodhi një vit më parë, do hiqen.
Ekzaktësisht fraza e Ramës ishte kështu: “Kush e ka përgjegjësinë për grupet e këshilltarëve të Partisë Socialiste nëpër bashki, që bllokojnë punët e bashkive, sepse kryetari i bashkisë është i PD-së apo i LSI-së.
Kush e ka përgjegjësinë që në Çorovodë nuk jepet ndihma ekonomike, pse grupi i këshilltareve të PS-së nuk shkon në votim, për të nxjerrë kunjin me kryetarin e bashkisë.
Histori që na e ka bërë Saliu, na ka nxirë jetën në bashkitë tona dhe e përsërisim ne.
Kush e mban përgjegjësinë për këtë?
Ashtu sikundër kush e mban përgjegjësinë që individë të ndryshëm në këshillat socialiste të bashkive flirtojnë me kryetarët e bashkive për interesa personale dhe votojnë kundër vendimit të grupit?
Them që në totalitetin e vet, përgjegjësia mblidhet tek udhëheqësit politikë të qarqeve të Partisë Socialiste, disa prej tyre kanë jo dy kunguj, por dy bostane të mëdhenj nën një sqetull.
Nëse nuk i mbajnë dot, mësimi i mëparshëm është shumë i qartë, do lënë bostanin e qeverisë dhe do mbajnë bostanin e partisë”.
Atëherë le t’i marrim një nga një: Drejtuesit politik të qarqeve të PS-së janë: Blendi Klosi në Berat-Ministër. Mjedisi, Ilir Beqja në Dibër, Taulant Balla Elbasan. Vangjush Dako në Durrës, Gramoz Ruçi në Fier.
Blendi Çuçi në Gjirokastër-deputet, Niko Peleshi në Korçë-Ministër Bujqësie, Mimi Kodheli në Kukës.
Lindita Nikolla në Lezhë-ministre Arsimi, Erion Veliaj në Tiranë, Ditmir Bushati në Shkodër-ministër i Jashtëm, Damian Gjiknuri në Vlorë-Ministër i Energjisë.
Nga këta krerë qarqesh- ministra janë: Ditmir Bushati, Lindita Nikolla, Niko Peleshi, Damian Gjiknuri, Blendi Klosi.
Operacioni i Ramës siç e tha edhe vetë, dikujt mund t’i heqë ministrinë, e dikujt përgjegjësinë në qark, që të mos u lërë dy bostanë.
Ky është grupi i parë që mund të analizohet nga fjala që mbajti kryeministri dje si objekt i ndryshimeve.
Bushati, si ministër i Jashtëm mund të ketë reperkursion vetëm nëse në qershor ndodh që të ketë një rezultat negativ të vendimit për hapjen e negociatave.
Megjithatë Bushati ka gjasa që të lirohet nga qarku i Shkodrës, duke ja ngarkuar drejtimin politik Senida Mesit, e cila ndryshe nga Bushati ka më shumë fuqi dhe lidhje në territor dhe shikohet si kandidate potenciale për bashkinë.
Lindita Nikolla, ashtu si Bushati, është ministre prej 6 vjetësh e nisur jo keq me reformën në arsim, mandati i dytë ka qenë tronditës për Nikollën.
Si me rastin e LGBT-së në shkolla, ashtu edhe me rastet e dala për mësues problematikë. Në Lezhë, Nikolla ka mjaft probleme, pasi me rastin e hetimeve në bashki, një nga të hetuarit është edhe kreu i këshillit të qarkut, socialist dhe xhaxhai i Arben Ndokës.
Kush janë ministrat që mund të largohen në shtator?
Rama foli për lëvizje këshilltarësh dhe votash, ku edhe Lezha është e përfshirë. Ka gjasa që Nikolla të jetë më afër largimit si ministre sesa si drejtuese politike në qark. Blendi Klosi gjithashtu në Berat ka pasur probleme që ju përmendën në Çorovodë. Ku nuk ndihmojnë kryetarin e Bashkisë, apo edhe lëvzje votash.
Nëse Rama e heq nga ministër Klosi do të qëndrojë vetëm drejtues politik në Berat. Niko Peleshi, ministër i Bujqësisë drejton politikisht Korçën. Ai deri tani nuk ka pasur problem as në Korçë e as në dikasterin që drejton. Ka shumë gjasa të qëndrojë në të dyja.
Damian Gjiknuri, ministri i Energjisë drejton qarkun Vlorë, ku është prezent edhe Rama që e ka qarkun e tij.
Gjiknuri konsiderohet si një nga ministrat që ka më shumë mbështetjen dhe besimin e kreut të qeverisë.
E ka lëvizur nëpër qarqe sa herë ka pasur probleme, ndërkohë që në qeveri i ka dhënë fuqi gjithnjë e më të mëdha.
Damian Gjiknuri është realisht njeriu më me pushtet në ekzekutiv pas Ramës e ka në duar të tij fonde gjigande. Por a ka gjasa të largohet?
Indikacionet mungojnë në këtë rast, por asgjë nuk përjashtohet nga Rama…
Për Lajm-shqip
Ylli Pata
