Kukësi ka prezantuar zyrtarisht trajnerin e ri, austriakun Peter Pacult.
Kukësi prezanton zyrtarisht trajnerin e ri
I pranishëm në konferencën për shtyp, presidenti Safet Gjici ka zyrtarizuar në krye të klubit të tij edhe drejtorin e ri sportiv, Nderim Nexhipi, ish-kapitenin e Partizanit.
Presidenti Gjici
“Ne kemi firmosur me z.Pacult, i cili do të jetë trajneri i ri i Kukësit. Uroj të na shkojë mbarë. Besoj fort te ky trajner me eksperiencë. Ai ka një “CV’ të pasur. E falënderoj shumë që ka pranuar të bashkëpunojë me ne. Pacult pranoi të firmosë me ne, teksa ishim në bisedime prej dy javësh. Unë besoj se është hera e parë që vjen një trajner i tillë në Shqipëri.”, tha ndër të tjera Presidenti Gjici.
Objektivat
“Ne nuk lëvizim nga objektivat, mbrojtja e titullit kampion dhe fitimi i Kupës së Shqipërisë. Natyrisht, kemi marrë edhe drejtor sportiv, i cili është Nderim Nexhipi, një emër i njohur. Gjithashtu, edhe pozicioni i tij nuk është pa rëndësi. Besoj që mes trajnerit dhe drejtorit do të jetë i suksesshëm ky bashkëpunim. Nexhipi do të jetë dhe përgjegjës për marrëdhëniet me publikun në klub. Kemi pasur dikë që vetëm ka afruar lojtarë, por na duhet dhe dikush që te shesë lojtarë jashtë vendit”, tha Gjici.
Trajneri Pacult
“Synojmë të luajmë futboll të mirë dhe minimalisht të arrijmë një vend në Europë. Jemi në vendin e katërt, por na duhen edhe dy lojtarë për të përforcuar skuadrën. Shpresojmë të jemi të suksesshëm. Na duhen lojtarë cilësorë, sepse unë kërkoj futboll ofensiv. Shpresoj të përshtatemi me idetë e reja. Kam punuar më parë me Hamdi Salihin te Rapidi dhe në Shqipëri kam ardhur shpesh për të ndjekur disa lojtarë”, tha Pacult.
Peter Pacult është një emër i njohur për publikun shqiptar pasi vite më parë është përfolur për të marrë edhe drejtimin e Kombëtares Shqiptare.
03.01.2018
