Gjirokastër, 28.12.2017 / Kryetarja e bashkisë së Gjirokastrës Zamira Rami u vendos sot tërësisht në shërbim të të moshuarve. Ajo drekoi së bashku me 60 pjestarët e moshës së tretë që bashkëjetojnë në Shtëpinë e të Moshuarve. Një institucion publik që është celur rreth 50 vjet më parë.
Të ngjashme mund të lexoni:
Kryetarja Zamira Rami, shprehet për Lajm-Shqip se:
“Shërbimi për të moshuarit në këtë qëndër rezidenciale publike është i garantuar, cilësor dhe i bazuar në standartet e shërbimit cilësor. Në shërbim të të moshuarve është i angazhuar një staf me punonjës të specializuar për këtë tipologji shërbimesh special për moshën e tretë.”
Stafi i Shtëpisë së të Moshuarve në Gjirokastër, sipas Ramit realizon një vlerësim të personalizuar të nevojave për çdo të moshuar. Njëkohësisht bëhën përpjekje të përditshme për plotësimin e nevojave të identifikuara për këta njerëz që para se të hyjnë në këtë rezidencë kanë jetuar të vetmuar dhe të braktisur nga të afërmit dhe shoqëria.
Krahas stafit kësaj residence i qëndrojnë pranë edhe biznesmenë vendas, shoqata të shoqërisë civile dhe grupe vullnetarësh që realizojnë për të moshuarit shërbime dhe shoqërizime komplementare.
Aktualisht në Shqipëri funksionon një sistem i përkujdesit social për të moshuarit që përbëhet nga institucione rezidenciale publike dhe jo publike. Shtëpitë e të moshuarve publike janë në Tiranë, Shkodër, Kavajë, Fier, Gjirokastër, Poliçan. Në tërë sistemin e shërbimeve rezidenciale trajtohen gjithsej 480 të moshuar, nga të cilët 300 janë në qendrat publike dhe 180 në qendrat jo publike.
Për Lajm Shqip
Engjëll Serjani
