TIRANE– Në mbledhjen e sotme Këshilli i Lartë i Drejtësisë, verifikoi zgjedhshmërinë, pajtueshmërinë dhe ushtrimin në përputhje me ligjin, të detyrës së dy anëtarëve të rinj të KLD-së, Artan Broci dhe Astrit Haxhialushi, të zgjedhur nga Konferenca Gjyqësore Kombëtare një javë më parë.
KLD konsideroi se zgjedhja e dy anëtarëve të rinj është në pajtueshmëri me ligjin. Në diskutimet e anëtarëve, u vlerësua eksperienca e gjatë profesionale e dy anëtarëve të rinj, si dhe integriteti i lartë moral.
Ndërkohë disa prej pikave kryesore të shqyrtuara në mbledhjen e sotme Këshilli i Lartë i Drejtësisë, vendosi t’i propozojnë Presidentit të Republikës, emërimin e Evjeni Sinojmeri, gjyqtare pranë Gjykatës së Apelit Tiranë.
Këshilli vendosi të caktojë Ilir Mustafajn, përfaqësues, njëherazi Kryetar të Komisionit të Posaçëm për Mbrojtjen e Gjyqtarëve , pas përfundimit të mandatit të kryetares së mëparshme.
Diskutimet e Këshillit vijuan me shqyrtimin e projekt akteve përfundimtare të vlerësimit të Kryeinspektores së Inspektoratit të Këshillit të Lartë të Drejtësisë për 2 gjyqtarë. Mbas realizimit të procedurës së votimit të këtij projekt akti, në përfundim u vendos vlerësimi “shumë mirë” për gjyqtarët e Gjykatës së Rrethit Gjyqësor Tiranë Brunilda Kadi dhe Fatri Islami.
20.12.2012
Burimi: Balkanweb
KLD: Zgjedhja e dy anëtarëve të rinj, në pajtueshmëri me ligjin
