Një ngrehinë e veçur nga shtëpitë e fshatit shërben si shkollë për fëmijët! Askush nuk e beson në pamje të parë, se aty mësohet shkrim e këndim. Vetëm kur banorët të tregojnë me gisht, se ajo është shkollë, do të duhet ta besosh. Në pamjë të parë, duket si kasollet e braktisura, kushedi prej sa vjetësh. Në vend të derës, tri copa dërrasa të lidhura me tela, si dhe një kyç i ndryshkur. Vendin e xhamave, banorët e kanë sajuar me dy copaza plastmasi, që i ka shqyer era. Brenda ngrehinës, mund të dallohet si shkollë, nga shëmbëlltyra e ca tavolinave të shtrembëruara, që shërbejnë si banga.
Kjo “shkollë” ndodhet në Gracen të Elbasanit. Qyteti që i dha dije dhe gjuhë gjithë shqipëtarëve. Brenda saj, qëndrojnë me frikën e shembjes dhe dridhjen nga të ftohtit afro 12 nxënës. Ka dhe fëmijë të tjerë fshati, por prindërit i kanë dërguar në shkolla të tjera më të mira. Këtu kanë mbetur më të varfërit. Nuk bëhet fjalë për ngrohje apo tabela mësimore.
Banorët pohojnë se janë më komode kasollet e lopëve të tyre, sesa shkolla e fshatit.
Të pyetur për këtë problem, drejtues të Bashkisë së Elbasanit, kanë deklaruar :
“ Sa kohë që banorët e fshatit nuk kanë zgjidhur konfliket e pronësisë mbi një copë tokë si truall për shkollë, nuk mund të ndërtohet godina e re. Nuk ka tokë shtetrore, që të nisim punimet. Jemi gati të ngremë shpejt shkollën e re. Por konfliktet për pronën, e kanë bërë të pamundur këtë miniprojekt.”
Sidoqoftë, fëmijët e këtij fshati janë të rrezikuar në këtë ngrehinë. Muret janë gati në të rënë. Edhe çatia po ashtu. Nuk mund të flitet për kushte të tjera të procesit mësimor.
Për Lajm Shqip
Alfrida Danushi
