Në Tiranë, siç është bërë e ditur dhe nga kryebashkiaku Erion Veliaj do të ndërtohen shkollat e reja, në total 17 dhe së fundmi po zbulohen dhe projektet e tyre.
Ndërtimi i tyre do të nisë që këtë vit. Ato do të jenë gati në vitin e ri shkollë 2019. Do të kenë strukturë moderne, krejt ndryshe nga shkollat aktuale. Do të jenë me një qasje perëndimore si në infrastrukturë, ashtu edhe në konceptimin për të qenë epiqendra kulturore dhe sociale të qytetit.
Ndërkaq, shkollat 9-vjeçare do të kenë edhe kopësht të integruar brenda tyre.
Përveçse do të zgjidhin për herë të parë problemin 27-vjeçar të mësimit me dy turne, siç edhe u premtua nga kryebashkiaku Erion Veliaj në zgjedhjet e 2015-ës, godinat e reja të Tiranës do të jenë një mjedis i hapur për të gjithë. Kjo do të ndodhë sipas konceptit të ri si “qendra komunitare”. Ato do mund të shfrytëzohen edhe gjatë pasditeve nga nxënësit dhe komuniteti rreth saj, për aktivitete të ndryshme social-kulturore.
Ja si do të jenë shkollat e reja në Tiranë, zbulohen projektet
Ndërtimi i tyre është përcaktuar në çdo njësi administrative të Tiranës. Aty ku edhe nevoja është më e madhe, në bazë të dendësisë së popullsisë. Këto shkolla janë planifikuar të kenë të gjitha ambientet e nevojshme akademike. Do të kenë klasat mësimore, duke përfshirë laboratorët e fizikës, kimisë, biologjisë, informatikës etj. Do të kenë palestër me ambientet ndihmëse të saj, hapësirat administrative, hapësirat shoqërore, etj.
Për të përballuar ndryshimet klimaterike, godinat do të pajisen me sisteme të ngrohjes qendrore. Një kujdes i veçantë i është kushtuar edhe sistemimit të mjediseve të jashtme, me terrene sportive, gjelbërim dhe ndriçim të jashtëm.
17.02.2018
