Arsyeja se pse Ministria e Financave i ka lënë Doganat, pa “Letra”!, është për të lehtësuar shërbimet për qytetarët. Por dhe për sipërmarrjen. Kjo, pasi institucioni në fjalë, po modernizon sistemin doganor, duke shmangur shkresurinat.
Ja pse Ministria e Financave i ka lënë Doganat, pa “Letra”!
Përdorimi i sistemeve të reja elektronike dhe përmirësimi i atyre ekzistuese, ka qenë një nga objektivat kryesore të administratës doganore.
Kjo, tashmë është edhe një detyrim i legjislacionit doganor në fuqi. Ndërsa, për këtë është miratuar dhe një plan i posaçëm nga Ministri i Financave. Realizimi i të cilit, do sjellë krahas përafrimit të legjislacionit me atë europian, dhe përafrimin e procedurave doganore që lidhen me lehtësitë dhe thjeshtimet. Në një intervistë për ATSH-në, Drejtori i Procedurave pranë Drejtorisë së Përgjithshme të Doganave (DPD), Saimir Sinani shprehet se ndryshimet e fundit për dixhitalizimin e sistemit janë të lidhura, me reformën e derregullimit të ndërmarrë nga qeveria shqiptare.
Si dhe vënien në funksionim të nënshkrimit elektronik, për të gjithë procedurën e shdoganimit.
Gjithsesi, përparësitë që rrjedhin nga këto risi, thotë ai, lidhen me aplikimin dhe miratimin në rrugë elektronike (on-line). Për një sërë autorizimesh e licencash që duhet të lëshohen nga autoritetet doganore.
Aktualisht operatorët ekonomikë apo përfaqësuesit e tyre mund të aplikojnë në kohë reale (on-line). Për disa nga regjimet e posaçme si dhe për procedura që lidhen me pullat e akcizës.
Nënshkrimi elektronik, sipas Sinanit, ashtu si në rastin e aplikimit, është elementi kryesor i deklarimit on-line. I cili, i paraprin procesit të gjerë dhe shumë të rëndësishëm të “doganës pa letra”.
“Në këtë kuadër, objektivi ynë është që deri me 15 mars të fillojë funksionimi i nënshkrimit elektronik. Ndërsa, deri me 30 qershor do të operohet me deklarimin në rrugë elektronike edhe në rrugë shkresore. Por, pas 30 qershorit vetëm me deklarim on-line (pa letër)”, deklaroi zyrtari i DPD-së.
Me këtë, thotë Sinani, synohet ulje e ndjeshme e kohës dhe kostove për individët dhe operatorët ekonomikë.
Po ashtu, ky sistem, mban operatorët ekonomikë larg sportelit të doganës. Kjo, me qëllimin e minimizimit të mundësive korruptive.
Drejtori i Procedurave pranë DPT-së, foli edhe për zhdoganimin e centralizuar.
“Zhdoganimi i centralizuar është një sistem që i mundëson vendeve me territor doganor të vogël, përqendrimin e procedurave doganore në një zyrë të vetme. Pra, mundëson verifikimin e deklarimit në doganë, pavarësisht zyrës në të cilën është depozituar deklarata doganore”, tha ai.
Nëpërmjet përdorimit të këtij sistemi, sipas Sinanit, synohet përdorimi i saktë, unifikimi dhe standardizimi i metodologjisë së vlerësimit. Duke shmangur dukurinë e deritanishme që lidhet me vlerësime të ndryshme në zyra të ndryshme doganore për mallra të njëjtë.
Po ashtu, kjo sjell minimizimin e subjektivizmit dhe mundësive korruptive në vlerësimin doganor, “Në funksion të skemës në fjalë janë vënia në funksionim i kanalit ‘BLU’. I cili bënë përzgjedhjen për kontrollin aposterior (pas zhdoganimit) operativ”, deklaroi Sinani
Për realizimin e kësaj skeme (sistemi) të vlerësimit në qendër, stafi teknik i drejtorisë së Përgjithshme të Doganave, ka bërë një punë kolosale studimore, për pothuajse 8 muaj. Ku është parashikuar çdo aspekt teknik, në mënyrë që skema të jetë sa më funksionale. Si dhe t’i shërbejë më së miri qëllimit për të cilin është ndërtuar, e mbyll, Drejtori Sinani.
Për lajm-shqip:
Leonard Xhelili
