Muaj shkurt ka marrë vëmendjen e ndërkombëtarëve për shkak të protestës popullore që do të zhvillohet nga opozita.
Ambasadori i Bashkimit Evropian në Shqipëri, Luigi Soreca, ka dhënë një intervistë për Dw, ku është shprehur se kjo protestë duhet të organizohet në kushte paqësore dhe se organizatorët do të mbajnë
përgjegjësinë për ecurinë e protestës.
Më tej Soreca shtoi se ky është një moment me rëndësi për Shqipërinë në kuptimin që e drejta e tubimit, e drejta e fjalës, janë një pjesë thelbësore e çdo shoqërie demokratike.
Zyrtari i lartë i BE-së nënvizoi se Shqipëria duhet të fokusohet te detyrat që ka përpara dhe të gjitha palët duhet të bashkëpunojnë.
Pjesë nga deklarata:
“Ky është një moment me rëndësi për Shqipërinë në kuptimin që e drejta e tubimit, e drejta e fjalës, janë një pjesë thelbësore e çdo shoqërie demokratike.
Por është gjithashtu e vërtetë që këto të drejta duhet të ushtrohen në mënyrë paqësore. Prandaj, presim një manifestim paqësor, që të mos kthehet në dhunë.
Kjo është një thirrje për të gjitha palët e përfshira. Është e rëndësishme që të gjithë të jenë konstruktivë.
Shqipëria duhet të fokusohet te detyrat që ka përpara dhe të gjitha palët duhet të bashkëpunojnë.
Nuk ka kohë për të humbur, është koha për të shprehur mendime dhe pastaj të mendojmë për të mirën e të gjithë shqiptarëve.
Nga deklaratat më të fundit të organizatorëve, kuptohet që ata duan të sigurojnë që do të marrin të gjitha masat për të bërë të mundur që siguria e qytetarëve të përfshirë të jetë e garantuar.
Ky është lajm i mirë dhe shpresoj që të gjitha palët e përfshira do ta respektojnë”,theksoi ambasadori Soreca.
Kujtojmë se Policia e Shtetit ka dhënë një njoftim se do të zhvillojë një kontroll të rreptë ndaj qytetarëve deri në ditën e protestës.
Ndërsa për PD-n kjo deklaratë përbën thjeshtë një panik për qytetarët.
Visar Quni
14.02.2019
