Shoqëria civile ishte shume kritike me qëndrimet e OSBE për reformën elektorale dhe vlerësimet për proceset zgjedhore në Shqipëri. “Forumi civil 2010”, ku angazhohen ish-Presidentet Moisiu dhe Mejdani, i cilësoi si të dyfishta dhe shpesh kontradiktore rekomandimet e ODIHR. Ambasadori i OSBE-se, Eugen Volfart, nuk i ka ndjekur gjitha vërejtjet e forumit, pasi siç tha vetë pak më vonë, kur u rikthye në sallë, pati një urgjencë dhe duhej të përgjigjej në telefon. Por deklarata e tij e kapërceu gjuhen diplomatike, raporton Vizion Plus.
Ambasadori Volfart tha se OSBE vetëm asiston, por nuk drejton procesin, pasi Shqipëria si një vend sovran nuk mund të fajësojë të huajt për problemet e saj.
“Nuk janë të huajt ata që drejtojnë, por qytetarët e këtij vendi. ODIHR nuk imponon zgjidhje, por jep vetëm këshilla dhe Parlamenti vendos. Është edhe puna e shoqërisë civile që të ushtrojë presion mbi Parlamentin që reforma të mbyllet në kohë,” ka thënë kreu i Prezencës së OSBE-së.
Moisiu ka kritikuar gjithashtu edhe KQZ-në, duke u shprehur se vepron vetëm pas telefonatave që merr nga politika.
“E kuptojmë që mazhoranca mund të jetë komode në këtë ligj, por nuk mund të biem dakord në asnjë mënyrë ne të tjerët. Po nuk u rregullua ashtu siç duhet kjo gjendje, atëherë me të drejtë mund të shtrohet pyetja: A ia vlen të marrësh pjesë në një votim, ku rezultati është i paravendosur në mënyra nga më të pështirat? Është shumë i rëndësishëm riformatimi i KQZ-së. Është vënë në dukje se ky institucion i rëndësishëm zgjedhor, duhet të jetë tërësisht i pavarur dhe jo i komanduar me telefon apo nga interesat partiake. Edhe ky problem u ngrit nga ne që përpara zgjedhjeve të vitit 2011. Për fat të keq u anashkalua, jo vetëm nga përfaqësues të politikës shqiptare, por edhe nga ata të institucioneve dhe përfaqësive ndërkombëtare,” tha Moisiu.
29.06.2012
Burimi: Gazeta Tema
