Balerini i njohur Ilir Shaqiri ka patur një karrierë të suksesshme si balerin në Itali. I ftuar në programin “Rudina” ditën e djeshme ai ka rrëfyer rrugëtimin e tij plot sfida e vështirësi deri në momentin e shijimit të suksesit.
Shaqiri ka rrëfyer një moment të vështirë nga jeta e tij, atë të kohës kur ishte balerin i Teatrit të Baletit në Shkup të Maqedonisë.
Ja si shprehet Shaqiri për këtë periudhë të errët të jetës së tij:
“7 muajt e jetës sime dhe karrierës sime në Maqedoni kanë qenë shumë të vështira, pasi të gjithë ishin maqedonas dhe askush nuk më thoshte as mirëmëngjesi, as mirëmbrëma, as si je. Pas 7 muajsh u detyrova të filloja të mësoja gjuhën në mënyrë që të komunikoja. Ata filluan më pas të ishin më të lirshëm dhe të më flisnin. E para fjalë që më thanë ishte a do kafe? Mu duk sikur më folën muret dhe isha shumë i tronditur. Më foli një shqiptar që quhej Besimi. Nga turpi asnjëri atje brenda nuk e dinte që Besimi ishte me nënë shqiptare dhe baba jugosllav. Me tha, po ta them vetëm ty që unë jam shqiptar”.
Sa i takon eksperiencës në shkollën e baletit në Shqipëri ai tregon:
“Shkollën e baletit e kam filluar në moshën 10-vjeçare. Nuk kisha shumë dëshirë për të filluar shkollën e baletit, si të gjithë çunat doja të merresha me futboll, por prindërit më dhanë shumë shtyrje, sepse donin që unë ta jetoja atë që ata nuk patën fatin ta jetonin në kohën e dhimbshme të komunizmit.
Isha një fëmijë shumë i bindur. Filloi me shumë dhimbje, sepse duhet të ushtrohesh, trupi duhet të hapet. Kur kam filluar unë ka qenë shumë e vështirë, pasi standardi ishte shumë i egër, kushtet ishin shumë të varfra. Kaluan 8 vite mes orë e orë sakrificash. Pas vitit të 5-ë fillova ta doja sepse ke fituar shumë gjëra, ke fituar autonomi dhe ke dëshirën për ta demonstruar. Në shkollën e baletit hynin 20 persona dhe çdo tre muaj, ishin provimet nëse i kaloje të merrnin, në të kundërt të hiqnin dhe nisje një shkollë tjetër. Kur arrinim 18- vjeç, përfundonin klasat vetëm me nga 3 persona”.
Ilir Shaqiri tregon kohën e vështirë që kaloi si balerin në Maqedoni, askush nuk i fliste…
Shaiqiri ka treguar dhe për familjen e tij. Marrëdhënien me gruan dhe vajzën e tij të vetme Emily-n. Ja si shprehet balerini:
“Me Emanuelën jemi njohur në një program televiziv. Filloi shumë miqësore dhe më pas u ritakuam në Romë, bashkëjetuam dhe më pas u martuam. Martesa ime ka qenë shumë intensive dhe e shkurtër ditët e para, pasi isha në tre programe njëkohësisht. Vajza Emily është 13 vjeçe dhe jam shumë krenar”.
Për lajm-shqip:
Klajdi Thaçi
10.07.2018
