I është dhënë lamtumira e fundit sot aktorit të mirënjohur të teatrit të Durrësit Milto Profi. Ai ka ndërruar jetë ditën e djeshme në qytetin e Durrësit në moshën 80-vjeçare.
I jepet lamtumira e fundit aktorit të mirënjohur Milto Profi.
Homazhet në nderim të artistit, që realizoi dhjetëra role në skenën e teatrit “Aleksandër Moisiu” u zhvilluan sot në orën 10.00 paradite. Homazhet janë zhvilluar në hollin e këtij teatri. Të pranishëm për t’i dhënë lamtumirën e fundit artistit ishin familjarët e miq. Nuk munguan kolegë, aktorë të njohur shqiptarë si edhe personalitete të fushave të ndryshme në qytetin bregdetar të Durrësit.
Milto Profi lindi në Durrës në vitin 1937. Përfundoi studimet në Akademinë e Arteve në Tiranë në vitet ’60. Për disa vite punoi si regjizor në Estradën Prifesioniste të Tiranës.
Në fund të viteve ’60 u emërua aktor pranë trupës së teatrit Aleksandër Moisiu të Durrësit. Ai ju bashkangjit emrave të shquar si Nikolin Xhoja, Vangjel Heba, Teodor Rupi, Spiro Urumi, etj. Emra që e ngritën lart emrin e këtij teatri me mjeshtërinë e tyre artistike.
Milto Profi numëron një numër të madh shfaqjesh Teatrale në repertorin e tij aktorial. Ai ka interpretuar në 42 shfaqje ku vlejnë të përmenden interpretimet te “Kartela e Verdhë”, “”Fluturimi i Breshkës”, “Revizori”, “Mulliri i Kostë Bardhit” e të tjera shfaqje ku ai spikati me lojën e tij.
Për Lajm-Shqip
Silvi Feimi
22.02.2018
