I dërguari i Bashës në Bruksel: Hapni negociatat. Gerti Bogdani, kreu i marrëdhënieve me jashtë në PD i ka kërkuar BE-së të hapë negociatat me Shqipërinë.
Bogdani, i cili në zgjedhjet e fundit nuk u kandidua për deputet, gjithsesi ende është Sekretar Ndërkombëtar. Ai ka qenë i dërguari i Lulzim Bashës në një takim të Partive Popullore Europiane që u mbajt në Bruksel.
Bogdani ka kërkuar nga qeveritë Europiane të hapin negociatat por ta mbajnë Edi Ramën nën presion.
Sipas njoftimit të shpërndarë nga selia blu, “Bogdani rikonfirmoi qëndrimin e PD për mbështetjen e hapjes së negociatave të anëtarësimit, duke argumentuar se sa më afër integrimit në Bashkimin Europian të jetë Shqipëria, aq më shumë llogaridhënie dhe mbajtje përgjegjësie do të ketë për qeverinë”.
I dërguari i Bashës në Bruksel: Hapni negociatat.
Ndërkaq, ish-deputeti i opozitës ka ngritur në Bruksel edhe çështjen e arrestimeve të protestuesve në Kukës. Ai u kërkoi vendeve anëtare të Bashkimit Europian të mos mbyllin sytë dhe veshët ndaj situatës në Shqipëri. Bogdani theksoi se liritë dhe të drejtat e njeriut në Shqipëri janë përkeqësuar ndjeshëm, dhe se ekonomia është përqendruar në duart e disa oligarkëve, klientë të qeverisë.
Bogdani përmendi kontratën koncesionare të Rrugës së Kombit.
Ai deklaroi se taksat e larta ishin arsyeja përse banorët e Kukësit u ngritën në protestë të bashkuar, pa dallime.
Për Lajm-shqip
Ylli Pata
