I dehur në kabinën e avionit, 10 muaj burg për pilotin japonez në Londër… Një pilot i një linje ajrore japoneze është dënuar me 10 muaj burg këtë të enjte në Londër. Ai dështoi në testin antialkool vetëm pak përpara ngritjes në fluturim nga Aeroporti ndërkombëtar “Heathrow” i kryeqytetit britanik. Oficer i parë me titull, Katsutoshi Jitsukawa, 42 vjeç, u dënua nga Gjykata në Londrën perëndimore, pasi norma e konsumit të alkoolit prej tij ishte sa 10-fishi i asaj të lejuar. Bashkëpiloti japonez u arrestua në “Heathrow” më 28 tetor, pasi dështoi në testin antialkool vetëm 50 minuta përpara se fluturimi “JL44” i kompanisë japoneze me destinacion Tokion të nisej me të alkoolizuarin në kabinë. “Ju jeni një pilot me shumë eksperiencë. Qartësisht kishit pirë shumë alkool, për një kohë të gjatë dhe deri pak momente përpara se të futeshit në avion”, tha gjykatësi Philip Matthews.
I dehur në kabinën e avionit, 10 muaj burg për pilotin japonez në Londër
“Më e rëndësishmja nga të gjitha është siguria e të gjithë personave në bord, për më tepër në një udhëtim kaq të gjatë prej 12 orësh apo më shumë. Siguria e tyre u vu në rrezik nga gjendja juaj e dehur dhe intoksikimi juaj. Mundësia që ju të merrnit drejtimin e atij avioni është e tmerrshme qoftë edhe ta mendosh. Pasojat potenciale ndaj atyre në bord do të ishin katastrofike”. Testimi i frymëmarrjes dhe frymënxjerrjes rezultoi me norma mbi 10 herë më të larta, sesa limiti prej 93 miligram në 100 mililitra frymënxjerrje. Avioni “Boeing 777” që pritej të drejtohej prej tij mund të mbante deri në 244 pasagjerë në një fluturim, por fatmirësisht gjithçka u kap në kohë dhe ai u nis me 69 minuta vonesë.
Erjona Keta
30.11.2018
Të ngjashme mund të lexoni:
- Konfirmohet lidhja mes reperes Nicki Minaj dhe pilotit të F1 Lewis Hamilton…
- Shtyhet 5 orë fluturimi i një avioni, kapet i dehur piloti në Rinas…
- Video/ Panik në avion, pasagjerët nuk i binden pilotit …
