Gjelat e detit nga zona e Baldushkut, janë kthyer në traditë për tavolinën e çdo qytetari të Tiranës. Për të tretin vit radhazi, tregu i posaçëm hapet për të gjithë qytetarët. Ai u jep mundësi të blejnë produkte të certifikuara nga shërbimi veteriner dhe me çmime më të lira.
Kryetari i Bashkisë së Tiranës, Erion Veliaj, u njoh me kushtet e tregtimit të shpendëve. Ai tha se tashmë rritja e gjelit të detit është një “patentë” që identifikon zonën e Baldushkut.
“E kemi kthyer në traditë për tre vite me radhë. Që gjeli i detit të Baldushkut është i pazëvendësueshëm në tavolinën e çdo qytetari të Tiranës. Ashtu siç ka rroba firmato dhe makina me logo të shtrenjta. Gjeli ‘firmato’ i Shqipërisë është gjeli i Baldushkut”, tha Veliaj.
Vetëm vitin e shkuar, në Tiranë u shitën rreth 28 mijë gjela deti. Duke gjeneruar rreth 1.4 milionë dollarë. Ndaj, kryebashkiaku Veliaj u bëri thirrje qytetarëve që të konsumojnë produkte të zonës. Sepse kështu kontribuojnë edhe në rritjen e ekonomisë lokale.
“Nuk ka kuptim një tavolinë e festave nëse nuk ndihmojmë ekonominë lokale. Jo vetëm shija është më e mirë, jo vetëm çmimi është më i lirë. Por ndihmojmë ekonominë vendase. Më mirë t’i mbajmë këto para, sepse kur dikush blen gjel nga Baldushku, nuk ka siguruar vetëm darkën e Vitit të Ri. Por ka paguar që një fëmijë të shkojë në shkollë, të vishet, t’i blihen librat. Dhe që një familje të jetojë me dinjitet këtu në fshat, pa u dyndur të gjithë në Tiranë.”
Veliaj tha se tregu që hapet në Baldushk është i certifikuar.
Ai funksionon me standardet e higjienës. Duke u kthyer në furnizuesin kryesor të gjelit të detit për familjet e Tiranës në darkën e Krishtlindjeve dhe Vitit te Ri. Ai vlerësoi se ngritja e një tregu të tillë jo vetëm që ka rritur sigurinë ushqimore për qytetarët e Tiranës, por njëkohësisht ka ndikuar pozitivisht edhe në ruajtjen e higjienës në rrugët e qytetit.
“Sot, edhe Tirana është më e pastër. Edhe Pazari i Ri është më dinjitoz, edhe ushqimi është bio dhe blihet këtu”, tha kryebashkiaku Veliaj.
24.12.2017
