TIRANE – “Valbona grindej shpesh me ish-burrin. Dy net më parë ai i kishte ardhur te shtëpia dhe trokiste në derë, derisa e lejoi të hynte brenda… Ishte grua e qetë dhe shihte punën e saj…”. Një prej grave që jetonte komshie me Valbona Çarçanin, zbardh sherret e 46-vjeçares me ish-bashkëshortin, Genci, i cili i mori jetën me katër goditje thike. Gruaja nuk pranon të identifikohet, por shprehet se e njeh mjaft mirë viktimën. “Ndalonte gjithmonë dhe më përshëndeste. Blinte ndonjë gjë tek dyqani dhe dilte shëtitje me qenin. Ish-burri grindej shpesh me të. Mesa duket ishte xheloz. Ziheshin dhe për probleme ekonomike. Valbona ishte pa punë dhe mezi e përballonte jetesën. Lekët që i sillte ish-burri as për qera nuk i mjaftonin”, thotë gruaja. Edhe banorë të tjerë, tregonin se ish-bashkëshorti i viktimës ishte xheloz, edhe pse Valbona lëvizte vetëm ose në shoqërinë e dy vajzave dhe jo e shoqëruar me ndonjë person tjetër që mund të ngrinte dyshime për ndonjë lidhje të mundshme. “I vinte vonë tek shtëpia dhe nuk ikte nëse se linte të hynte brenda”, tregojnë banorët. Një punonjës i lavazhit pranë të cilit u qëllua për vdekje gruaja tregon momentin e vrasjes. “Ne dëgjuam vetëm të bërtitura. Ai burri e goditi dhe iku. Kur u afruam kishte vdekur. Një grua i hodhi sipër një çarçaf viktimës”, tregon djali. Hatije Demiri 70 vjeç, është personi i fundit që e ka takuar Valbona Çarçanin para se të goditej për vdekje nga i shoqi. E moshuara ka pirë me Valbonën kafen e mëngjesit dhe tregon momentet e fundit me të.
Znj.Demiri kur e ke takuar për herë të fundit Valbonën?
Erdhi sot në mëngjes. U ul këtu te lokali dhe më tha ti bëj një kafe. Zakonisht pinte çaj boronice, por sot (dje) në mëngjes piu kafe. I thashë nëse donte qumësht, por më tha jo do ta pi kafe shqeto, se kam diçka të mbledhur në stomak, sikur nuk jam mirë.
Po pastaj çfarë ndodhi?
Valbona doli të shëtiste qenin. Dilte shpesh, se ishte dhe papunë dhe nuk kishte si ta kalonte kohën.
Sa kohë kishte që banonte këtu pranë jush?
Ka ardhur që para Vitit të Ri. Jetonte në një garsionere me dy vajzat. Të dyja vajzat vinin këtu te lokali.
Ju fliste për veten?
Po më kishte treguar se kishte jetuar në Itali dhe para dy vitesh ishin kthyer. Për divorcin nuk më kishte folur gjatë, por e dija që ishte ndarë.
Po ish-burrin e saj e kishit parë ndonjëherë?
Jo unë se njihja, po më thonin se vinte herë pas here.
Nga bisedat me Valbonën keni mësuar me çfarë jetonte?
I jepte ca lekë burri për vajzat. Pak lekë. Ishte dhe e papunë e shkreta. Ndaj ulej dhe në kafe shumë rrallë. Kur mora vesh se ishte vrarë nuk e besoja. Ishte njeri i mirë, grua fjalëpakë e rrinte në hallet e saj. Se di si mund të vritet njeriu në mes të rrugës.
14.07.2013
Burimi: Balkanweb
