Greqia flet për një “rrugë të duhur”: Problemet Tiranë-Athinë…
“Tirana dhe Athina janë në rrugën e duhur. Shumë shpejt do të dalin me një zgjidhje të përbashkët për problemet mes tyre.”
Deklarata është bërë nga Ministri i Jashtëm grek Nikos Kotzias në një intervistë për gazetën “Ethnos”.
I pyetur nëse është optimist për një zgjidhje pakete, Kotzias mendon që dy palët ndodhen në rrugën e duhur për një marrëveshje që do të jetë pozitive për të dyja palët.
“Brenda historisë së përbashkët të dy popujve tanë, u krijuan ndërvarësi të shumta. Linja konflikti, por edhe mundësi miqësie. Duhet të zgjidhim problemet e së kaluarës. Të punojmë për të mirën sot dhe të sigurojmë një agjendë pozitive bashkëpunimi për të ardhmen.” tha ministri grek
Duke u ndalur tek paketa e zgjidhjeve, Kotzias thotë se po diskutohet gjetja e një rruge të përbashkët që të kënaqë të dyja palët.
Lidhur me shqetësimet dhe problemet e vjetra që kanë Shqipëria dhe Greqia.
“Sa i përket problemeve dhe mundësive për veprim të përbashkët, disa i interesojnë më shumë palës shqiptare dhe të tjera palës greke . Përballimi i tyre në mënyrë të përbashkët përbën atë që në teorinë e negociatave quhet zgjidhja –paketë. Sepse merret në konsideratë asimetria ekzistuese e interesit për tema të ndryshme”, – ka thënë Kotzias.
I pyetur nëse ka ndonjë shenjë ndryshimi në qëndrimin e qeverisë Rama kundrejt Athinës, Kotzias thekson: “Në Tiranë është bërë i kuptueshëm fakti që rruga evropiane e vendit është më e rëndësishme se disa çështje të tjera.”
Kujtojmë se Kotzias dhe homologu i tij shqiptar Ditmir Bushati nisën bisedimet në Kretë për gjetjen e zgjidhjeve. Këto bisedime mes palëve tashmë do të zhvendosen në Tiranë, gjatë vizitës së tij në kryeqytetin shqiptar në ditët në vijim.
04.12.2017
