Kanë qenë pothuajse 500 agresionet me sfond racist të kryera në gjashtë muajt e fundit në Greqi.
Kështu thotë Shoqata e Punëtorëve Emigrantë, sipas të cilës rritja e valës së dhunës ksenofobe nuk u lejon më atyre të shëtisin të qetë nëpër rrugë.
Në shumicën e rasteve viktimat janë sulmuar dhe goditur me leva hekuri, doreza hekuri, shkopinj bejzbolli dhe në disa raste edhe me thika.
Pak ditë më parë, një emigrant 19-vjeçar nga Iraku u sulmua me thika dhe mjete të forta nga një grup prej të paktën pesë personash me motoçikleta, në qëndër të Athinës dhe disa orë më vonë humbi jetën në një prej spitaleve të kryeqytetit.
Vrasja ndodhi në një kohë kur shoqëria greke ishte e tronditur nga akti i një pakistanezi në ishullin Paros, disa ditë më parë, i cili pasi përdhunoi një 15-vjeçare greke, u përpoq ta vrasë atë duke e hedhur nga shkëmbinjtë.
Sikur të mos mjaftonte kjo, dy ditë më vonë në këtë ishull, katër persona të cilët dyshohet se janë shqiptarë, gjatë vjedhjes së një banke qëlluan për vdekje një shofer taksie që u përpoq t’i ndalonte.
Shumë qytetarë të qëndrës së Athinës e shohin me një sy pozitiv operacionin “Ksenios Zeus” që është ende në zhvillim prej policisë greke, e cila ka arrestuar më shumë se 1500 emigrantë ilegale.
Në rrugët e kryeqytetit qarkullojnë shumë pak emigrantë, sidomos nga vendet aziatike dhe afrikane, me frikën e arrestimit apo të sulmeve me motive raciste, për të cilat akuzohen të rinj që mbështesin partinë e ekstremit të djathtë Agimi i Artë (Chrisi Avgji).
Ndërkohë, vihet re se grupet e trafikantëve të qënieve njerëzore përpiqen që tashmë të çojnë sa më shumë prej qindra mijëra emigrantëve të huaj që ndodhen në Greqi drejt qyteteve europiane si Mynihu, Brukseli, Barcelona dhe Amsterdami.
16.08.2012
Burimi: Top Channel
