Mbetet mister identiteti i personave që rrahën me leva dhe i grabitën 100 milion lekë, kambistit Skënder Hasani. Policia e Tiranës ka shoqëruar gjatë ditës së djeshme rreth katër persona, por që në fakt asnjëri prej tyre nuk është identifikiuar si personi që ka qënë në vendgjarje. Për llogari të hetimit agjentët e policisë kanë marrë në cilësinë e provës materiale, disa pamje filmike të regjistruara nga kamerat e një supermarketi, që ndodhet shumë afër me hyrjen e pallatit ku ndodhi dhe grabitja e kambistit. Ndërkohë që janë marrë deklarimet e rojeve të dy bizneseve që ndodheshin afër hyrjes së pallatit, të cilët kanë treguar para policisë se kanë vënë re vetëm dy persona që kanë dalë me vrap nga pallati dhe janë futur në tunelin e një pallati, prej nga dhe janë zhdukur nëpër rrugicat e lagjeve të zonës. Vetë i dëmtuari Skënder Hasani, që ndodhet i shtruar në spital nuk ka mundur të japë një përshkrim të plotë mbi karakteristikat e autorëve, duke sjellë vështirësi në punën e policisë. Ai ka treguar për efektivat e policisë, se kanë qënë dy persona ata që së bashku me të kanë hipur në ashensorin e pallatit dhe pikërisht aty e kishin qëlluar me mjete të forta, duke i marrë dhe çantën e mbushur me para. Sipas policisë, dy personat e kanë ndjekur për gjatë gjithë pasdites të dëmtuarin,duke planifikuar dhe vendin se ku do të kryenin grabitjen blic.
SHPRESAT TEK KAMERAT
E vetmja shpresë e policisë që mund ta çojë grupin hetimor tek autorët e krimit janë pamjet filmike te rregjistruara nga dy kamerat e një supermarketi. Sipas policisë, nga verifikikmi paraprak është konstatuar se filmimet janë të dobëta për shkak edhe të errësirës së natës. Ndërkohë që momentalisht filmimi i është dërguar specialistëve të laboratorit kriminalistik për të parë nëse figura e filmimit mund të pastrohet me anën e aparaturave teknologjike. Mbrëmjen kur ka ndodhur ngjarja, policia ka bërë dhe kontrollin e ashensorit me shpresën se në ambjentet e tij, administratorët e pallatit mund të kishin instaluar kamer.Por në fakt gjatë kontrollit nuk është arritur të gjendet asnjë kamer e instaluar. Ndërkohë që banorë të tjerë të pallatit të pyetur rreth kësaj çështje kanë treguar në polici, se nuk kanë parë asnjë konflikt mes të dëmtuarit Skënder Hasani dhe grabitësve të tij. Kjo për shkak se sipas tyre, ora kur ka ndodhur ngjarja e rëndë ka qënë në mesnatë, dhe se disa prej tyre kanë qënë në gjumë dhe nuk kanë ndjerë asgjë. Policia në vendin e ngjarjes ka fiksuar disa gjurmë gishti, në muret anësore të ashensorit dhe pritet që shumë shpejt ato të bëhen objekt i krahasimeve me gjurmë të tjera të dyshimta.
02.08.2012
Burimi: Gazeta Shqiptarja
