Sa orë gjumi nevojiten për të rikuperuar sa më mirë energjitë e harxhuara gjatë ditës? Teoritë për këtë çështje janë të ndryshme. Deri në fund të shekullit të kaluar, mendohej se mjaftonin 4 deri në 5 orë, por kërkimet që kishin çuar në këtë konkluzion nuk ishin të bindshme. Ndërkohë një studim më i kujdesshëm është kryer nga David Dinges, nga Laboratori i Kronobiologjisë në Universitetin e Pensilvanisë, i cili ka ekzaminuar një duzinë vullnetarësh për të parë se çfarë efektesh do të shkaktonte privimi i gjumit. Së bashku me kolegun e tij, Hans van Dongen, Dinges, i ndau vullnetarët në tre grupe në bazë të numrit të orëve të gjumit në ditë për dy javë: në grupin me katër, shtatë dhe tetë orë gjumë. Përgjatë një dite, dy studiuesit kryen testin e vigjilencës psikomotorike te subjektet e mostrës, konsiderohet sistem i besueshëm për të vlerësuar të metat e gjumit.
Përgjatë këtij tipi analizash, kampioni (personat vullnetarë që merrnin pjesë në eksperiment) u vendos përballë një kompjuteri për disa minuta, ku iu la për detyrë të shtypnin butonin e hapësirës në tastierë sa herë që shfaqej një numër mbi ekran. Me kalimin e kohës, ata që kishin fjetur më shumë, pra tetë orë, treguan një standard të mirë, ndërsa grupet me nga 4 deri në 6 orë gjumë përkeqësoheshin javë pas jave. Dinges në këtë mënyrë zbuloi se 8 orë gjumë janë ideale dhe rigjeneruese. Në fund të fundit, një gjumë i mirë u bën mirë të gjithëve, është i nevojshëm për të karikuar trupin dhe mendjen me energjinë e nevojshme për të përballuar jetën stresuese të çdo dite. Miguel Servantes thoshte me të drejtë: “I bekuar qoftë ai që shpiku gjumin, kapuçin që mbulon të gjitha mendimet e njeriut, ushqimin që heq urinë, ujin që shuan etjen, zjarrin që largon të ftohtin, monedhën me të cilën mund të blesh gjithçka, peshoren e cila barazon mbretin dhe të varfrin”.
Të flesh 8 orë gjumë është një bekim për mirëqenien tonë. Një gjumë i mirë ka fuqinë të rikarikojë energjitë tona, përmirëson humorin, mbron shëndetin e zemrës dhe sistemin tonë imunitar. Sigurisht që me jetën frenetike që bëjmë, të flesh shumë dhe mirë është pak luks. Ndërkaq, është mjaft e vërtetë që mungesa e gjumit influencon negativisht mbi jetën tonë dhe për këtë arsye është thelbësore që të bëjmë sa të mundemi që të flemë sa më mirë.
Kur nuk flemë për një natë:
-Lëkura “vuan”. Nëse nuk pushojmë mjaftueshëm lëkura jonë do të hakmerret. Për këtë fakt kur të zgjohemi në mëngjes do të kemi një çehre të zbehtë dhe sy të nxirë;
– Ekziston rreziku që të marrim vendime të gabuara. Pjesa e trurit që kontrollon logjikën, dorëzohet, ndaj është shumë më e lehtë që ne të bëjmë gabime;
– Rritet ndjeshmëria ndaj dhimbjeve. Pagjumësi shteron rezervat tona të serotoninës dhe kjo çon në një rritje të ndjeshmërisë së dhimbjeve të ndryshme;
– Bëhemi shumë nervozë. Lodhja mund të na çojë në një gjendje ankthi dhe nervozizmi në rritje.
Nëse nuk arrini të flini për disa net me radhë:
–Është e vështirë që të arrini të përqendroheni. Pas disa netëve pa gjumë, kapaciteti ynë i përqendrimit dëmtohet rëndë, madje edhe për të kryer detyra të thjeshta.
– Shfaqet rreziku për t’u sëmurur nga diabeti. Të humbasësh orë të shumta gjumi për disa ditë redukton aftësinë e mbajtjes së ekuilibrit të nivelit të sheqerit në gjak.
Mungesa e gjumit për një kohë të gjatë çon në:
-Obezitet. Pak gjumë shkakton ndryshime metabolike, të cilat grumbullojnë më lehtë yndyrën;
-Sëmundje kardiovaskulare
Pa bërë aspak pushim, muskujt e zemrës mbingarkohen; kjo mund të shkaktojë rritje të presionit të gjakut apo një trashje e muskujve të zemrës;
-Shqetësime psikologjike
Fjetja e paktë mund të shkaktojë luhatje humori dhe kjo është e lidhur me fillimin e depresionit;
-Ul ose shkatërron funksionin e sistemit imunitar; sistemi imunitar mund të ndalë së funksionuari në mënyrën më efikase.
01.05.2013
Burimi: ikub.al