I bëjnë pritë para shtëpisë dhe e sulmojnë gazetaren malazeze, e cila është e njohur për hetimin e korrupsionit në biznes dhe qeveri. Sipas mediave vendase, ajo u qëllua dhe u plagos përpara shtëpisë së saj në Podgoricë, të martën vonë, tha policia.
Foto/ Sulmohet për herë të dytë gazetarja, hetonte korrupsionet qeveritare
Mund të kishte ndodhur që plagosja e gazetares investiguese, të ishte një tragjedi për familjarët. Gazetarja malazeze e përjeton këtë atentat për herë të dytë, por dhe kësaj here ka qenë shumë me fat. Mbrapa këtij atentati fshihen klane mafioze, në të cilat gazetarja ka bërë edhe hetime për të nxjerrë në dritë të vërtetën.
“Olivera Llakiç u plagos me plumb në këmbën e saj të djathtë, por jeta e saj nuk është në rrezik”, tha shefi i policisë, Vesko Damjanoviç.
Llakiç 49 vjeçe, punon në gazetën “Vijesti” është sulmuar edhe gjashtë vjet më parë, ku është goditur disa herë në kokë. Damjanoviç tha se policia “do të bëjë çmos për të zbuluar autorët dhe për t’i sjellë para drejtësisë”. Ambasadori i Bashkimit Evropian në Mal të Zi, Aivo Orav, tha se sulmi mbi gazetaren Olivera Llakiç është shumë shqetësues.
“Gazetarët duhet të mbrohen”, tha ai në një postim në Twitter. Mali i Zi shpreson të anëtarësohet në Bashkimin Evropian në vitin 2025.
Ambasada e Shteteve të Bashkuara në Podgoricë shprehu po ashtu shqetësim për sulmin. Muajin e kaluar, një bombë ka shpërthyer pranë shtëpisë së një tjetër gazetari malazez, në qytetin Bijello Pole.
Për lajm-shqip:
Jorida Fataj
09.05.2018
