DURRES- Do të mbahet mend gjatë si një nga festat më të bukura që janë realizuar ndonjëherë në Shqipëri… E kemi fjalën për ditëlindjen e Ninës, vajzën e Inva Mulës dhe Hetem Ramadanit. Festa, e cila u organizua në një prej hoteleve më të njohura në plazhin e Durrësit, filloi që në orën 8 të mbrëmjes së të martës (30 prill), me një koktej, dhe fundin e pati pasditen e së mërkurës (1 maj). Në të ishin të ftuar plot 300 vetë dhe surprizat nuk kishin të sosur. Mbrëmja filloi me prezantimin e një klipi mjaft interesant, ku shfaqeshin momentet më pikante nga viti i parë i jetës së Ninës. Pas tij radhën e pati një spektakël fishekzjarrësh, që mbajti të mbërthyer në oborr të mëdhenj e të vegjël… Grupi i kërcimtarëve të vegjël dhe grupi i valltarëve i dhanë një start të mirë mbrëmjes. Nata vazhdoi më tej me fryrjen e qirinjve, ku këngën e ditëlindjes, Ninës së vogël ia këndoi nëna e saj, sopranoja e madhe shqiptare Inva Mula. Shoqërues i nënës në këtë performancë shfaqej edhe Anthony, i cili së bashku me Genc Tukiçin krijuan melodinë e himnit të ditëlindjes në piano. Por numrat artistikë nuk kishin të sosur… Në skenë qëndronin Kamela, Xhoi e Landi, por shumë shpejt këtij grupi iu bashkua edhe sopranoja Vikena Kamenica, e cila, nën shoqërimin e violinistit famoz Olen Çesari, bëri një performancë të shkëlqyer. Radhën pas saj e patën poezitë mbresëlënëse të Agim Doçit e Timo Fllokos. Enada Hoxha e Gerd Vaso ishin çifti që si qershia mbi tortë shtuan glamurin në sallë… Mes të afërmve në festë kishte edhe mjaft fytyra publike, si: profesori i nderuar Adem Demaçi, babai i sopranos tenori Avni Mula, profesori i saj Robert Radoja, Zhani Ciko, Suzana Turku, Vera Grabocka e Timo Flloko, Rudina Magjistari me të dashurin, Zana Çela, Mira Meksi, Joni Peçi, Ledina Çelo me familjen etj… Veç tyre, nuk i shpëtuan syrit tonë dhuratat dhe lulet shumëngjyrëshe për Ninën e vogël. Sikundër nuk na shpëtuan as urimet e shumta për të voglën e divës shqiptare, së cilës i urojmë edhe ne 100 vite të tjera jetë! E lumtur dhe e gëzuar, siç ishin të gjithë njerëzit për të atë ditë. Edhe 100 Nina!
04.05.2013
Burimi: Balkanweb
