Shtabi i emergjencës i Prefekturës Gjirokastër ka evakuar rreth 20 fëmijë romë.
Fëmijëve romë për shkak të rreshjeve të pandërprera u rrezikohej jeta në banesat e tyre.
Burime nga prefektura thanë për Lajm-Shqip se zona ku ndodhen banesat e komunitetit rom rrezikohen nga vërshimet e përroit malor të Teqes së Zallit dhe për këtë arsye u evakuan fëmijët deri në 12 vjeç dje nëse rreziku shtohet me vazhdimin e rreshjeve do të evakuohet edhe banorët e tjerë.
Me interesin e drejtpërdrejtë të kryetares së bashkisë Zamira Rami, fëmijët romë u strehuan në mjediset e konviktit të Pedagogjikes. “Personeli i Agjensisë e Mirëqenies dhe Kujdesit Social pranë bashkisë është angazhuar totalisht për të krijuar të gjitha kushtet e nevojshme për fëmijët rome të evakuar, për strehim, ngrohje dhe ushqim”, tha drejtori i kësaj agjensie Armand Mamani.
Për transportin e të evakuuarve u angazhuan mjetet e repartit të zjarrfikësve dhe emergjencave civile.
Rreshjet e shiut që kanë nisur qysh në orët e para të ditës kanë vazhduar me intesitet të lartë deri në orët e mbrëmjes duke shkaktuar vërshimin e përrenjve malorë dhe mbulimin e rrugëve të qytetit me prurje inertesh që kanë sjellë bllokimin e disa arterieve të rrjetit të brendshëm rrugor të qytetit të Gjirokastrës.
Pë Lajm-shqip
Engjëll Serjani
