Europa- Ekonomia e Gjermanisë shënoi rritje në fillim të këtij viti, por rritja nuk ishte e mjaftueshme për të ndalur rënien e eurozonës në tërësi në pjesën e recesionit ekonomik për tremujorin e gjashtë radhazi, ndërsa lajm negativ ishte edhe fakti se tashmë bashkë me vendet e jugut në rënie ekonomike është edhe Franca.
Rënia e prodhimit në të gjithë bllokun me 17 vende nënkupton që ky është recesioni më i gjatë që kur filloi të matet ekonomia e rajonit në tërësi në vitin 1995. Për periudhën janar-mars, ekonomia e eurozonës u zvogëlua me 0.2 për qind, rënie edhe më e madhe sesa ajo e parashikuar nga analistët.
“Mizerja vijon”, tha Carsten Brzeski, një ekonomist i lartë në Bruksel. “Pothuajse të gjitha vendet e rëndësishme, me përjashtim të Gjermanisë, janë në recesion tashmë dhe se asgjë nuk ka funksionuar për të ndalur spiralen për poshtë.
Përveç Francës, ekonomia u pakësua në Finlandë, Qipro, Itali, Holandë, Portugali dhe Greqi. Në Spanjë rënia vijon tashmë prej 18 muajsh.
Gjermania, e cila prodhon gati një të tretën e të gjithë ekonomisë së eurozonës, u rrit me vetëm 0.1 për qind, duke shmangur recesionin, por duke vënë në dukje ndikimin shkatërrimtar të krizës së borxheve sovrane dhe bankave që ka sjellë rritje të papunësisë. Sot në kontinent ka plot 19 milionë njerëz të papunë.
Zyrtarisht një ekonomi konsiderohet në recesion kur shënon dy tremujorë negativë radhazi. Italia, ekonomia e tretë më e madhe e kontinentit, raportoi për tremujorin e shtatë radhazi me rënie ekonomike, pra recesioni më i gjatë që nga koha kur filluan të raportohen treguesit e ekonomisë çdo tre muaj në vitin 1970.
Recesioni këtë herë në eurozonë është më i gjatë sesa ai i viteve 2008/2009, por fakti është që kriza kësaj here nuk është kurrsesi aq e thellë sa atëherë. Euro ra në nivelin më të ulët në gjashtë javë kundrejt dollarit, por recesioni rriti shpresën e investitorëve për ndërhyrje sasiore nga ana e Bankës Qendrore Europiane.
BQE-ja uli interesat në një rekord tjetër historik këtë muaj, ndërsa kreu Mario Draghi tha se ishte gati të vepronte edhe më tutje. Disa udhëheqës të BE-së kanë bërë të ditur se po mendojnë për të lëvizur në krah të kundërt me politikën e shkurtimit të shpenzimeve, e cila është ndjekur që kur filloi kriza e borxheve në vitin 2009.
Por analistët presin që thyerja e spirales do të jetë e vështirë tashmë që qeveritë kanë vite që shkurtojnë shpenzimet, kompanitë kanë pushuar njerëz nga puna, konsumatorët po blejnë më pak dhe të rinjtë kanë pak shpresa për të gjetur një vend pune.
“Çdo rimëkëmbje e mundshme do të jetë shumë, shumë e ngadaltë”, komentoi Nick Kounis. Një sondazh mes ekonomistëve kryer nga “Reuters” sugjeroi se rritja do të rikthehet në pjesën e mbetur të këtij viti, por nuk do të jetë e fuqishme së paku deri në vitin 2015.
