Enigma / A do të jetë Thoma Jano, Kryeprokuror i përkohshëm?
Analizë nga Ylli Pata
Enigma për Kryeprokurorin
Thoma Jano, ja kush është kandidati, që po përflitet më shumë.
Tashmë, kohët për zgjedhjen e Kryeprokurorit të Përkohshëm janë shtrënguar shumë.
Sot pritet që të paraqiten kandidaturat, që do të vetëofrohen për të drejtuar institucionin e akuzës, deri në zgjedhjen e Prokurorit të ri të Përgjithshëm.
Sipas dispozitës kalimtare, kandidatët, që mund të drejtojnë përkohësisht Prokurorinë, duhet të kenë:
Ose të paktën eksperiencë 15-vjeçare, ose të kenë mbaruar shkollën e Magjistraturës.
Ndërkaq, siç mësohet, dy janë kandidaturat për të marrë postin e Kryeprokurorit kujdestar.
Thoma Jano dhe Dritan Rreshka
Thoma Jano, aktualisht, shef i Përgjimeve në Proukurorinë e Përgjithshme dhe Dritan Rreshka, prokuror i Taskë- Forcës në Prokurorinë e Tiranës.
Jano ka një përvojë të gjatë dhe kjo mund t’i japë pikë më shumë.
Ndërkohë që, Rreshka mësohet se, përveç Magjistraturës së përfunduar, gëzon edhe simpatinë e faktorit ndërkombëtar.
Sipas burimeve, deri tani Thoma Jano mbetet më i kuotuari, por ende nuk dihet.
Do të përfundojë në listat zyrtare që shoshiten sot?
Por, kush është Thoma Jano?
Thoma Jano është në fakt një kandidaturë, që gërsheton përvojën në thuajse të gjithë periudhat e drejtësisë shqiptare.
Ai është nga të vetmit, që i kanë mbijetuar furtunave të mëdha politike, që kanë trazuar institucionin më të rëndësishëm të akuzës në vend.
Jano ka punuar për hetimet që në periudhën e para viteve ’90, ku ka qenë shef i Hetuesisë në Krujë.
Në kupolën e Prokurorisë është ngjitur pas vitit 1997, kur punoi si kreu i prokurorisë së Tiranës.
Gjatë kësaj kohe, institucioni drejtohej nga Arben Rakipi.
Fatos Nano, kur ishte kryeministër e afroi në qeveri, duke e emëruar zv.ministër të Rendit Publik për të drejtuar Sektorin e Hetimeve në këtë dikaster të rëndësishëm.
Më pas edhe në radhën “Sollaku” dhe “Ina Rama”, Jano punon si prokuror në Prokurorinë e Përgjithshme.
Me Adriatik Llallën, Thoma Jano, merr një pozicion shumë delikat, pasi punon në sektorin e përgjimeve.
Në këtë post, si prokuror më shumë se përgjimet, ai ka ndjekur ligjshmërinë e aktit të përgjimeve që kryhen nga specialistët e Shërbimit Informativ Shtetëror.
Në tërë periudhën e punës së tij, Jano nuk është i përfolur as për afera e as për çështje të bujshme.
Njihet si jurist i shkallës së lartë, që e njeh Jurisprudencën në mënyrë perfekte.
Në të gjithë pozicionet, që ka mbajtur, më shumë se punët praktike në çështje të caktuara, Thoma Jano është marrë me jurisprudencën dhe vlerësimin ligjor.
Dhe kjo duket se është pika më e fortë e tij.
I papërfshirë kurrë në politikë
Nga ana tjetër, një tjetër anë pozitive e Janos është se ka punuar më shumë në administratë dhe nuk është përfshirë kurrë në politikë.
Çka në fakt përbën edhe një pikë thelbësore për integritetin e një kandidati për kryeprokuror…
Për Lajm Shqip
Ylli PATA
