“Ishte një djalë i mrekullueshëm dhe dëshironte të ndihmonte këdo.

Fliste me superlativa për islandezët dhe i pëlqenin njerëzit atje”, tha nëna e të riut nga Çorovoda, Natasha Sula.

Ajo shtoi më tej se, Klevisi ishte shumë i lumtur që ishte në Islandë.

Sipas asaj që është publikuar në mediat vendase, por edhe dëshmive të miqve të shumtë të 20-vjeçarit në rrjetet sociale, vdekja e të riut erdhi pasi Klevisi iu afrua një burri që po qante, me gjasë për ta ndihmuar.

Autori iu kthye duke e goditur me thikë atë, së bashku me mikun e tij.

Ky i fundit, sipas mediave, ndodhet jashtë rrezikut për jetën.

Natasha Sula udhëtoi drejt Islandës pas sulmit së bashku me vëllain e 20 – vjeçarit.

Ajo rrëfeu për mediat se i biri i kishte folur për sigurinë në këtë vend, duke i thënë se asgjë nuk ndodhte kurrë atje.

“Nuk mendonim se kjo mund të ndodhte këtu.

Klevis na kishte treguar se asgjë e keqe nuk ndodhte kurrë në Islandë.

Ai kishte ardhur këtu për të punuar dhe për një jetë më të mirë”, tha më tej në rrëfimin e saj, znj. Sula.

Vdekja e të riut shqiptar ka tronditur opinionin publik atje dhe tërhequr një vëmendje të madhe në mediat islandeze.

Një llogari bankare u hap për shpenzimet e varrimit të tij dhe apelit për ndihmë iu përgjigjën shumë qytetarë.